„აფსნიპრესის“ ცნობით, ოკუპირებული აფხაზეთის ე.წ. სახელმწიფო უშიშროების სამსახურმა საქართველოსთან „სახელმწიფო საზღვრის“ არალეგალური გადაკვეთისთვის ახლო აღმოსავლეთისა და აფრიკის ქვეყნების 15 მოქალაქე დააკავა.
„სექტემბერში საქართველოსთან საზღვარზე ახლო აღმოსავლეთისა და აფრიკის ქვეყნების მოქალაქეების რამდენიმე ჯგუფმა აფხაზეთის სახელმწიფო საზღვრის დარღვევა სცადა. დაკავებულია 15 პირი. ისინი ეგვიპტეს, სომალის, იემენისა და სუდანის მოქალაქეები არიან. ორ პირს არანაირი საბუთი არ გააჩნია. ისინი სხვადასხვა დროს საქართველოში ჩავიდნენ, საიდანაც არალეგალურად რუსეთში და ევროპაში მოხვედრა სურდათ“, – განაცხადა ე.წ. სახელმწიფო უშიშროების სამსახურის პრესმდივანმა ასლან სალაყაიამ.
„აფსნიპრესის“ ცნობით, გამოძიების დასრულების შემდეგ, დაკავებულთა საქმეები დე-ფაქტო სასამართლოში იქნება გადაცემული.