საქართველოს მესამე პრეზიდენტი “ვივა მედის” კლინიკაში რჩება, პარალელურად მის ჯანმრთელობის მდგომარეობაზე დასკვნას ამზადებს ალტერნატიული კონსილიუმი. დოკუმენტს ელოდება მიხეილ სააკაშვილის ოჯახი, რომელიც შიშობს, რომ მკურნალობა დაგვიანებული აღმოჩნდება, რადგან მესამე პრეზიდენტის ჯანმრთელობის მდგომარეობა ყოველდღიურად მძიმდება.
სააკაშვილის ოჯახი ფიქრობს, რომ ალტერნატიული კონსილიუმის დასკვნა იქნება მნიშვნელოვანი, რომ გადაწყდეს მესამე პრეზიდენტის საზღვარგარეთ მკურნალობა.
“მიშა არ არის კარგად, ამას მეტყველებს მისი ვიზუალური მდგომარეობა, ის რომ აღარ ესწრება პროცესებს. მდგომარეობა არის კრიტიკული, მდგომარეობა არის იგივე, ამას დიდი ხანია ვიძახით, მოყოლებული იმ დროიდან, როდესაც დაიდო დასკვნა, რომ მისი სიცოცხლე არის საფრთხეში, რეალურად არაფერი შეცვლილია.
შესაბამისად, ჩვენ ვითხოვთ, დაიდოს სპეციალური დასკვნა, კიდევ ერთხელ, რომ საფუძვლად დაედოს მის სპეციალიზებულ, ევროპულ კლინიკაში გადაყვანას. თხოვნა შეწყალებაზე, სასჯელის შეცვლაზე არ არის, აქ არის საუბარი ადამიანის ჯანმრთელობაზე”, – ამბობს დავით სააკაშვილი.
ცნობისთვის, “ემპათიას” წევრი ექიმები მიხეილ სააკაშვილთან წინა კვირას იმყოფებოდნენ. მათ თქვეს, რომ დასკვნისთვის დაახლოებით 2 კვირა დასჭირდებათ.