უკრაინის პრეზიდენტი, ვოლოდიმირ ზელენსკი მსოფლიოს რუსეთისთვის მეტი სანქციების დაწესებისკენ მოუწოდებს. დავოსში მსოფლიო ეკონომიკურ ფორუმზე გამოსვლისას მან განაცხადა, რომ მისი ქვეყანა იმაზე მეტხანს იბრძვის, ვიდრე მოსალოდნელი იყო, თუმცა მას არ მოუწევდა ომის გადატანა, რუსეთისთვის რომ მკაცრი სანქციები შემოდგომაზე დაეწესებინათ.
ზელენსკის თქმით, რუსეთს “მაქსიმალური სანქციები” უნდა დაუწესონ იმისთვის, რომ ეს შემაკავებელი ფაქტორი გახდეს როგორც თავად მოსკოვისთვის, ასევე ნებისმიერი სხვა ქვეყნისთვის, რომელიც მეზობელი ქვეყნის ტერიტორიაზე შეჭრას განიზრახავს.
“მე გთავაზობთ იმას, რაზეც ისედაც მუდმივადაა საუბარი მსოფლიოში, უნდა დავამარცხოთ სიღარიბე, სასოწარკვეთილება, ქაოსი და ომი, რომელიც რუსეთმა წამოიწყო და რომელსაც არაფერი მოქვს გარდა შიმშილისა და უბედურებისა. ამისთვის ჩვენ უნდა ვიმუშაოთ ერთად და სწრაფად. არ უნდა დავუშვათ, რომ მოხდეს ახალი პრეცედენტები, აუცილებელია რუსეთიდან სრულად გავიდეს ყველა უცხო ქვეყანა, რათა ისინი არ გამოიყენონ მოსკოვის სისხლიანი ინტერესებისთვის. ჩვენ ვთავაზობთ მსოფლიოს შანსს, შეიქმნას პრეცედენტი იმისა, თუ რა მოხდება თუ რომელიმე ქვეყანა მეზობლის განადგურებას შეეცდება. გიწვევთ მონაწილეობა მიიღოთ ამ რეკონსტრუქციაში”, – თქვა ზელენსკიმ.
პრეზიდენტმა ხაზი გაუსვა, რომ საჭიროა სრული ემბარგო ნავთობის იმპორტზე, ყველა რუსული ბანკის გათიშვა გლობალური სისტემებიდან, რუსეთის IT სექტორისა და რუსეთთან ვაჭრობის შეწყვეტა.