ნიკა გვარამიას თავისუფლებისთვის და ქვეყანაში ცენზურისგან თავისუფალი მედიის არსებობისთვის მედიამენეჯერები და მედიის წარმომადგენლები დღეს რესპუბლიკის მოედანზე შეიკრიბებიან. სოლიდარობის მარში 19:00 საათზე დაანონსებული და მასში მონაწილეობის მიღება ყველა მსურველს შეუძლია.

მსვლელობა რესპუბლიკის მოედნიდან დაიწყება და საკანონმდებლო ორგანოსთან დასრულდება.

უკვე მეორედ გვიწევს პროტესტის ასე ხმამაღლა გამოთქმა და ქუჩაში გამოსვლა. პირველად ეს იყო, რა თქმა უნდა, 5 ივლისის და ლექსოს ამბავი, რომელმაც ჩბვენ გვაიძულა, მანამდე ქართულ ისტორიაში არნახული ჟურნალისტური საპროტესტო აქციების მოწყობა და ჩენ კიდევ ერთხელ ვაჩვენებთ ხელისუფლებას, რომ ერთმანეთის გვერდით ვდგავართ და არ დავუშვებთ არცერთი კონკრეტული მედიის და საერთოდ, ჯამში მთელი ქართული დამოუკიდებელი კრიტიკული მედიის ჩახშობას, – ამბობს “მთავარი არხის” ტელეწამყვანი და ჟურნალისტი, პაატა იაკობაშვილი.

ტვ პირველის გენერალური დირექტორი ვატო წერეთელი სოლიდარობის აქციაზე ელოდება ყველას, ვისთვისაც სიტყვის თავისუფლება მნიშვნელოვანია.

დღეს არის მშვიდობიანი აქცია-მსვლელობა მედიის ორგანიზებით. მე მოვუწოდებ ადამიანებს, ვინც თვლის, რომ სოლიდარობის გამოცხადება უნდა მედიისთვის, მობრძანდით დღეს რესპუბლიკის მოედანზე შვიდ საათზე და გამოხატეთ თქვენი სოლიდარობა ნიკას მიმართ, კრიტიკული მედიის მიმართ და ერთად მოვაწყოთ მშვიდობიანი მსვლელობა-აქცია, – თქვა ვატო წერეთელმა.

ტვ პირველის ჟურნალისტის, ინგა გრიგოლიას თქმით, თუ დღეს მედიამ თავისუფალ სამყაროს ხმა არ გააგონა, ხვალ შესძლოა, ქვეყანაშ თვაისუფალი სიტყვა აღარ ისმოდეს.

დღეს თუ ჩვენ ქუჩაში არ გავედით, არ გავაგონეთ ჩვენი ხმა თავისუფალ სამყაროს და არ ვუთხარით, რომ „გვიშველეთ”, იმიტომ, რომ ამ ქვეყანაში ძალიან მძიმე პროცესები იწყება, ხვალ შეიძლება თავისუფალი სიტყვა უბრალოდ აღარ ისმოდეს ამ ქვეყანაში. ამიტომ არის ძალიან მნიშვნელოვანი ეს სოლიდარობის აქცია, რომელიც გაიმართება დღეს საღამოს შვიდ საათზე. რესპუბლიკის მოედნიდან დავიწყებთ მსვლელობას და კიდევ ერთხელ გავიმეორებ; „ვიბრძვით მთავარისთვის“, – თქვა გრიგოლიამ.