ბრიტანეთის დაზვერვის ინფორმაციით, 23 მარტის მონაცემებით, კიევის სიახლოვეს უკრაინული ძალები რუსეთზე წნეხს ზრდიან. ამ პერიმეტრზე კი რუსეთს მარაგის სერიოზული პრობლემები აქვს, რუსი სამხედროები კი დემორალიზებულები არიან. 

ინფორმაციას დიდი ბრიტანეთის თავდაცვის სამინისტრო ავრცელებს.

მათი ინფორმაციით, უკრაინის საპასუხო შეტევები კიევთან ახლოს მდებარე ქალაქებში წარმატებულია. დაზვერვის ვარაუდით უკრაინამ დაიბრუნა რამდენიმე პატარა ქალაქი და სოფელი, მათ შორის მაკარივი და მოსჩუნიც.

„უკრაინის ძალები წარმატებით ახორციელებენ საპასუხო შეტევებს რუსეთის პოზიციებზე დედაქალაქის სიახლოვეს მდებარე ქალაქებში და, სავარაუდოდ, უკრაინამ ხელახლა დაიკავა მაკარივი და მოსჩუნი.

რეალურია შესაძლებლობა, რომ უკრაინულ ძალებს ახლა ბუჩასა და ირპინში რუსული დანაყოფების ალყაში მოქცევა შეუძლიათ“, – წერს ბრიტანეთის დაზვერვა.

ბრიტანეთის დაზვერვა ვარაუდობს, რომ უკრაინის საპასუხო შეტევები რუსულ ძალებს ხელახლა ორგანიზებასა და კიევზე შეტევის განახლებაში ხელს შეუშლის.

BBC-ს ინფორმაციით,   პრემიერმინისტრი ბორის ჯონსონი NATO-სა და დიდი შვიდეულის სამიტებზე გააკეთებს განცხადებას,   რომ 25 მილიონამდე ფუნტს გამოყოფს უკრაინელი ჯარისკაცებისა და მფრინავების ანაზღაურებისთვის. 

“გაერთიანებული სამეფო იმუშავებს ჩვენს მოკავშირეებთან ერთად, რათა გაძლიერდეს უკრაინის სამხედრო და ეკონომიკური მხარდაჭერა, გააძლიეროს მათი თავდაცვა, რადგან ისინი ამ ბრძოლის გარდატეხას მოახდენენ”

დიდი ბრიტანეთი უკრაინას დამატებით 6 ათას რაკეტას გადასცემს.