შიბოლეტი, ეს არის რაიმე სიტყვა ან ფრაზა რომელიმე ენაზე, რომელსაც მოცემული ენის არმცოდნე ან ცუდად მცოდნე ადამიანი გამართულად ვერ წარმოთქვამს და ამით მისი, როგორც უცხოელის, იდენტიფიცირება ხდება.

ბოლო დროს ხშირად გვსმენია და ხშირად გვინახავს ვიდეოც, სადაც უკრაინელები ერთი სიტყვის წარმოთქმას სთხოვენ ხოლმე უკრაინაში მყოფ რუსებს, რომლებიც ამბობენ, რომ არა ჩამოსულები, არამედ ადგილობრივები არიან. ეს სიტყვა კი გახლავთ “паляниця”, რომელიც უკრაინული პურის ერთერთი ნაირსახეობაა.

რაოდენ საოცარიც უნდა იყოს, ტესტი ზუსტია და მისი გამოყენებისას სწორად ადგენენ, სიტყვის წარმომთქმელი არის თუ არა დაბადებული და გაზრდილი უკრაინაში. არავინ იცის, რატომ, მაგრამ რუსები ამ სიტყვას სწორად ვერ წარმოთქვამენ. მეტიც, რუსები წერენ არა “паляниця”, არამედ «паляница».

17 მარტს დიდი ბრიტანეთის თავდაცვის მინისტრმა ბენ უოლესმა განაცხადა, უკრაინის პრემიერმინისტრის სახელით ჩემთან ხაზზე თაღლითი გამოვიდა და როცა დეტალებზე გადავედით და საუბარი საეჭვო გახდა, ხაზი გათიშაო. 

მას მალევე უპასუხა პრემიერმა შმიგალმა და სთხოვა: “შემდეგ ჯერზე, სანამ საუბარს დაიწყებთ, სთხოვეთ მას, წარმოთქვას სიტყვა:  “паляниця””, – დაწერა მან ტვიტერზე.