ქართული წარმოშობის რუს მედიამენეჯერსა და ტელეწამყვანზე, შესაძლოა, საერთაშორისო ძებნა გამოცხადდეს.
უკრაინის გენპროკურორი ირინა ბენედიქტოვა “ფეისბუქით” მიმართავს თინა კანდელაკს და აუწყებს მას, რომ უკრაინაში მისი სტატუსია “დანაშაულის ჩადენაში ეჭვმიტანილი პირი” და რომ უახლოეს დღეებში უკრაინის გენპროკურატურა დაიწყებს იმ პროცესის ინიცირებას, რომლითაც თინა კანდელაკზე საერთაშორისო ძებნა გამოცხადდება.
ბენედიქტოვამ განცხადებას თან დაურთო საბრალდებო დასკვნის ფოტოასლი, სადაც აღნიშნულია, რომ კანდელაკს ბრალი წარედგინა უკრაინის სისხლის სამართლის კოდექსის 110-ე მუხლის მეორე ნაწილით. მუხლი ქვეყნის კონსტიტუციური წყობის ან ხელისუფლების ძალადობრივად დამხობისკენ მოწოდებებს ეხება.
შეგახსენებთ, ამავე ბრალდებით უკრაინაში დაუსწრებლად მიუსაჯეს პატიმრობა რუს რეჟისორს ნიკიტა მიხალკოვსა და რუს მომღერალ ოლეგ გაზმანოვს.