აშშ-ის სახელმწიფო მდივნის მოადგილემ ვიქტორია ნულანდმა განაცხადა, რომ აშშ-ის სადაზვერვო მონაცემებით, რუსეთმა უკრაინაში აკრძალული, კლასტერული (იგივე კასეტური) ბომბები გამოიყენა.
“არის ფართო სპექტრის ინფორმაცია იმის შესახებ, რომ შესაძლოა, გამოყენებული იყოს იარაღის სხვა სახეობები”, – უთხრა ვიქტორია ნულანდმა “ეხო მოსკვის”. მისივე თქმით, ხშირია რუსი ჯარისკაცების დეზერტირობის შემთხვევები.
შეგახსენებთ, ე.წ. კასეტურ ბომბებს რუსეთი 2008 წლის რუსეთ-საქართველოს ომშიც იყენებდა. სწორედ ასეთი ბომბი ჩამოვარდა გორის ცენტრში, რასაც მშვიდობიანი მოქალაქეების, მათ შორის, ჰოლანდიელი ჟურნალისტის სიცოცხლე ემსხვერპლა.
კასეტური ბომბები ეწოდება რეაქტიული ზალპური სისტემის ისეთ ჭურვს, რომელიც კონტეინერებისგან შედგება, ხოლო ეს კონტეინერები ჰაერში იხსნება და გადმოაფრქვევს ფეთქებად საბრძოლო მასალებს, ე.წ. მცირეკალიბრიან ბომბებს ვრცელ ტერიტორიაზე.
ფეთქებადი საბრძოლო მასალების რაოდენობა, რომელიც ჭურვს ჰაერში გამოეყოფა და ამოიფრქვევა, მოდელზეა დამოკიდებული, ის რამდენიმე ათეულიდან 600-მდე მერყეობს. კასეტურ ბომბებს თვითმფრინავიდან ყრიან ან სამიზნე ტერიტორიაზე არტილერიის/რაკეტების დახმარებით აგზავნიან.