რუსეთის საოკუპაციო ძალებმა 30 ოქტომბრის ღამეს უკრაინის ქალაქ დნიპროს რკინიგზის სადგურზე განმეორებითი იერიში მიიტანეს. ქალაქი კვლავ ელექტროენერგიის გარეშე დარჩა. შეჩერებულია მეტროს, ტრამვაიებისა და ტროლეიბუსების მოძრაობა, წყალმომარაგების სისტემა კი გენერატორების საშუალებით მუშაობს.

დნეპროპეტროვსკის საოლქო სამხედრო ადმინისტრაციის ინფორმაციით, საავადმყოფოში გარდაიცვალა 40 წლის მამაკაცი, რომელიც 29 ოქტომბერს რკინიგზის სადგურზე რუსეთის თავდასხმის შედეგად დაიჭრა. დაღუპულთა რაოდენობა 15-მდე გაიზარდა.

29 ოქტომბერს რუსულმა რეაქტიულმა უპილოტო საფრენმა აპარატმა დნიპროს რკინიგზის სადგურის ბაქანს დაარტყა, სადაც სამგზავრო მატარებელი იდგა. თავდასხმის შედეგად დაიღუპნენ და დაშავდნენ მშვიდობიანი მოქალაქეები.

რუსეთმა საავიაციო ბომბით ხარკოვის ოლქის ქალაქ იზიუმსაც შეუტია. ქალაქის სამხედრო ადმინისტრაციის ცნობით, დაიღუპა ოთხი ადამიანი, კიდევ 14 კი დაშავდა.

ერთ-ერთ რაიონში ჩამოგდებული საჰაერო სამიზნის ნამსხვრევების ჩამოვარდნის შედეგად ნაწილობრივ დაინგრა ერთსართულიანი შენობა და გაჩნდა ხანძარი. ორ სხვა ადგილზე დაზიანდა საცხოვრებელი სახლის ფანჯრები და ავტომობილები.

უკრაინის საჰაერო ძალების ინფორმაციით, ღამის განმავლობაში საჰაერო თავდაცვამ რუსეთის მიერ გაშვებული 113 უპილოტო საფრენი აპარატიდან 96 გაანადგურა, ასევე ჩამოაგდო ოთხი Х-59/69 ტიპის რაკეტიდან სამი.

რუსული საჰაერო სამიზნეების მოხვედრა 17 ლოკაციაზე დაფიქსირდა, ხოლო ჩამოგდებული სამიზნეების ნამსხვრევები ხუთ ლოკაციაზე ჩამოცვივდა.