ამერიკული გამოცემა Washington Post საქართველოს შესახებ სარედაქციო სტატიას აქვეყნებს, სადაც წერია, რომ „ქართული ოცნების“ ხელისუფლება რეგიონში აშშ-ის ინტერესებისა და ტრამპის ადმინისტრაციის კავკასიური სტრატეგიისთვის მზარდ საფრთხედ იქცა. გამოცემა აღნიშნავს, რომ საქართველო, რომელიც წარსულში ვაშინგტონის „სანდო მოკავშირედ“ მიიჩნეოდა, დღეს სულ უფრო მეტად „ირანის ორბიტისკენ იხრება“.

სტატიაში ყურადღება გამახვილებულია აშშ-ის სახელმწიფო მდივნის, მარკო რუბიოს, სომხეთში ვიზიტზე და ერევანთან სტრატეგიულ მინერალებზე მიღწეულ შეთანხმებაზე. სარედაქციო კოლეგიის შეფასებით, ეს აჩვენებს, რომ თეთრი სახლი სამხრეთ კავკასიას განსაკუთრებულ მნიშვნელობას ანიჭებს, თუმცა პარალელურად ყურადღების მიღმა რჩება საქართველოს მზარდი დაშორება დასავლეთისგან.

Washington Post წერს, რომ „ქართული ოცნების“ ხელისუფლება წლების განმავლობაში დასავლელ პარტნიორებთან ურთიერთობების ხარჯზე რუსეთთან და ირანთან კავშირების გაღრმავებას ცდილობდა. გამოცემა ამ კონტექსტში „ჰადსონის ინსტიტუტის“ ანგარიშსაც ეყრდნობა, რომლის მიხედვითაც, ირანმა საქართველოში რელიგიური და საზოგადოებრივი ორგანიზაციების ქსელის გაფართოების შესაძლებლობა მიიღო, განსაკუთრებით ეთნიკურად აზერბაიჯანელი შიიტი მოსახლეობის მიმართულებით.