თელავში 8 თვის ორსული ქალი გარდაიცვალა – ინფორმაციას ადგილობრივი გამოცემა, “მთავარი ამბები კახეთიდან” ავცელებს. არსებული ინფორმაციით, დაიღუპა ნაყოფიც.
გამოცემა გარდაცვლილის მეგობრებზე დაყრდნობით წერს, რომ გარდაცვალების მიზეზი სავარაუდოდ სისხლძარღვებში წარმოქმნილი თრომბი გახდა.
მათივე თქმით, ორსულს ჯანმრთელობის პრობლემები ჰქონდა და ექიმის მეთვალყურების ქვეშ იმყოფებოდა.
„-ბოლო პერიოდში მკურნალობდა კიდეც, თუმცა თრომბი მაინც განვითარდა. სახლში იყო და შეტევა სწორედ იმ დროს დაეწყო,“- ამბობს ერთ-ერთი ახლობელი.
არსებული ინფორმაციით, შემთხვევის დროს სასწრაფო-სამედიცინო დახმარებაც გამოიძახეს, თუმცა ექიმებს ქალი უკვე გარდაცვლილი დახვდათ.
კლინიკაში, სადაც ორსული სამედიცინო აღრიცხვაზე იმყოფებოდა, ამ დროისთვის კომენტარი არ გაუკეთებიათ.