„იმედის“ გადაცემაში „ღია ეთერი – დებატები“ პარტიის „თავისუფლების მოედანი“ წარმომადგენელმა სიმონ ჯანაშიამ განაცხადა, რომ “აქ მოსულ ბატონებს ვერ გაურჩევიათ განსხვავება დისკუსიასა და დებატებს შორის”, რასაც მოგვიანებით ირაკლი კობახიძე გამოეხმაურა და განაცხადა, რომ დებატები და დისკუსია, თვისობრივად, ერთი და იგივეა, რაზეც სიმონ ჯანაშიამ ასეთი პასუხი გასცა: “არა, ასე არ არის: დისკუსიის მიზანია, რომ ადამიანები გაერკვნენ საკითხში და დებატების მიზანია, რომ მოიგო. ეს თუ არ იცით, მეცხრე-მეათე კლასს იქეთ არ გცოდნიათ…”. 

ამავე დროს, სიმონ ჯანაშიამ იმ კონტექსტზეც ისაუბრა, რაც ახლავს განათლების რეფორმაზე საუბარს სტუდიაში:

„როცა რეფორმაზე ვსაუბრობთ, უნდა განვიხილოთ კონტექსტი, რომელშიც ეს რეფორმა ხორციელდება, მერე უნდა გადავიდეთ რეფორმის მიზნებზე და მერე უნდა გადავიდეთ საშუალებებზე. ერთი ფაკულტეტი და ასე შემდეგ არის საშუალებები. იმ კონტექსტში, როცა ჩვენ გვყავს სტუდენტები, რომლებიც არიან პატიმრები, ამ კონტექსტში ვსაუბრობთ იმაზე რა ჯობია, ამ კონტექსტში ახორციელებენ ეს ბატონები ამ რეფორმას“, – მან ის სტუდენტები, მასწავლებლები და ხელოვანები ფოტოების თანხლებით ჩამოთვალა, რომლებიც პატიმრები არიან, შემდეგ კი ფოტოები მათვე გადასცა.