ფოთელ პედაგოგს, იგორ კეკელიას დეკემბერში გაუვრცელეს პირადი ცხოვების ამსახველი ვიდეოკადრები, რის შემდეგაც აიძულეს, თანამდებობა დაეტოვებინა.
პედაგოგი ამბობს, რომ მას არ სურს, ავტორიტეტშელახულმა გააგრძელოს ცხოვრება, ამიტომ განათლების სამინისტროს მიმართავს, რათა შსს-მ გამოიძიოს, ვინ ჩაიწერა და გაავრცელა პირადი ცხოვრების მასალები.
აი, როგორ იხსენებს ამ პროცესსა და თანმდევ მოვლენებს თავად პედაგოგი:
“ჩემთვის ცნობილი გახდა, რომ გავრცელდა სოციალურ ქსელში პირადი ცხოვრების ამსახველი კადრები. სავარაუდო გავრცელების შესახებ მაცნობეს პოლიციიდან, მე გამოვცხადდი, რასაკვირველია, პოლიციაში, ვინაიდან და რადგანაც ეს საქართველოს კონსტიტუციით არის მძიმე დანაშაული, მე კატეგორიულად მოვითხოვე, რომ აღძრულიყო სისხლის სამართლის საქმე და სავარაუდო გავრცელების ფაქტი თუკი ნამდვილად დადასტურდებოდა, სავარაუდო გამავრცელებლებიც უნდა დასჯილიყვნენ. პროკურატურას გონივრული ვადა უკვე ჰქონდა იმისათვის, რომ 10 დეკემბრიდან დღემდე ამ ფაქტთან დაკავშირებით გარკვეული ნაბიჯები გადაედგა…
მე რატომღაც ველოდი, რომ ჩემი სკოლის პედაგოგები გარკვეულ ემპათიას გამოხატავდნენ დაზარალებული პედაგოგის მიმართ, თუმცა დაზარალებულის სტატუსი დღემდე არა მაქვს მიღებული, მოწმის სტატუსით ვარ დაკითხული პოლიციასა და პროკურატურაში.
ამას მოჰყვა სკოლაში დაშინება, ბულინგი, ზეწოლა. თუკი მსგავსი კადრები გავრცელდა, ეს ხელს შეუშლის სკოლაში შენს საქმიანობას, შესაძლოა ადგილი ჰქონდა მასწავლებელსა და მოსწავლეს შორის კონფლიქტს, ამიტომ შენ უნდა დაწერო განცხადება და წახვიდე სამსახურიდანო” , – ამბობს ფოთელი პედაგოგი, იგორ კეკელია TV პირველთან საუბრისას.