პროკურატურამ 4 ოქტომბრის საქმეზე დაკავებული პირების ბრალდებაში ორგანიზატორებად გდდ-ს ყოფილ მაღალჩინოსანი, ირაკლი შაიშმელაშვილი და სამოქალაქო აქტივისტი ნანა სანდერი ჩაამატა.
ამის შესახებ ინფორმაციას მარიამ მეყანწიშვილის ადვოკატი ავრცელებს, რომელმაც ცენტრალური კრიმინალური პოლიციის შენობა ცოტა ხნის წინ დატოვა.
კერძოდ: მურთაზ ზოდელავა, ირაკლი ნადირაძე, ნანა სანდერი და პაატა ბურჭულაძე საზოგადოებას მოუწოდებდნენ რევოლუციის საჭიროებისაკენ, რომელშიც მონაწილეობა უნდა მიეღოთ აგრესიულად განწყობილ მოქალაქეებს. მათი განცხადებით, ისინი ერთობლივად დაამხობდნენ სახელმწიფო ხელისუფლებას და ამ მოქმედებების ეფექტიანად განხორციელებისათვის აუცილებელი იყო მასში საზოგადოების გარკვეული ჯგუფების მასობრივი ჩაბმა და გაერთიანება. 2025 წლის 4 ოქტომბერს, მურთაზ ზოდელავამ, პაატა ბურჭულაძემ, ნანა სანდერმა და ირაკლი ნადირაძემ საზოგადოების ფართო წრეს კვლავ საქვეყნოდ, აშკარად მოუწოდეს საქართველოს კონსტიტუციური წყობილების ძალადობით შეცვლისა და სახელმწიფო ხელისუფლების დამხობისაკენ.
ასევე ირაკლი შაიშმელაშვილი 2025 წლის 4 ოქტომბრის ჩათვლით, ცდილობდა სამართალდამცავთა დემორალიზებას და მოუწოდებდა მათ არ შეესრულებინათ სამსახურებრივი მოვალეობა, ხელი არ შეეშალათ ძალადობრივ მოქმედებებში მონაწილე პირებისათვის და ამ გზით მიეღწია თავისი მიზნებისათვის, რაც მიმართული იყო საქართველოს კონსტიტუციური წყობილების ძალადობით შეცვლისა და სახელმწიფო ხელისუფლების დამხობისკენ,” – წერია ბრალის დადგენილებაში.
გამომძიებლები გლდანისა და რუსთავის ციხეებში 50-მდე დაკავებულთან რიგ-რიგობით შედიან და ბრალს აზუსტებენ.