ნაშუადღევს სროლის ხმა ისმოდა ოკუპირებულ სოხუმში, გუმის ქუჩაზე, სადაც 11 ნოემბერს ტრადიციული სამგლოვიარო პროცედურა ტარდებოდა და ბევრი ადამიანი ირეოდა.
უცნობი პირები სხვადასხვა სახის ცეცხლსასროლი იარაღიდან ისროდნენ სახლის მიმართულეებით, მათი სამიზნე კი, დიდი ალბათობით, ე.წ. კანონიერი ქურდი რაულ ბარცბა, იგივე “პიზა” იყო. უცნობი პირები სახლიდან მოშორებით, მიტოვებულ შენობაში იყვნენ ჩასაფრებული.
თავდაპირველად გავრცელდა ინფორმაცია, რომ სროლის შედეგად ერთი პირი დაიღუპა, 4 კი დაიჭრა, მაგრამ მოგვიანებით ცნობილი გახდა, რომ ხუთივე პირი დაჭრილია, მათ შორის ორი კი რეანიმაციის განყოფილებაშია.
სროლა დაახლოებით 20 წუთის განმავლობაში გრძელდებოდა და თავდამსხმელები ისე გაუჩინარდნენ, რომ მათ შესახებ, ფაქტობრივად, არაფერია ცნობილი.
მომხდარის შესახებ საქმის კურში ჩააყენეს თვითგამოცხადებული პრეზიდენტი გუნბა და ე.წ. შს მინისტრი კიუტი, თუმცა, ცხელ კვალზე თავდამსხმელთა დაკავება ვერ მოხერხდა.
როგორც ჩანს, თავდამსხმელები პროფესიონალი მსროლელები იყვნენ, რასაც მიყენებული ჭრილობები მოწმობს:
ერთი ადამიანი თავშია დაჭრილი და სასწრაფო ოპერაცია უტარდებოდა. ასევე საოპერაციოდ შეიყვანეს მეორე დაჭრილიც, რომელსაც ტყვია მუცელში მოხვდა. შედარებით მსუბუქად, ხელში დაიჭრა კიდევ ერთი პირი, ხოლო სახესა და გულმკერდში დაჭრილი კიდევ ორი პირის მდგომარეობა ასევე მძიმეა, ისინი რეანიმაციის განყოფილებაში არიან.
-ლაშა ბერულავა-