ეუთო-ს (OSCE) მოქმედი თავმჯდომარე და ფინეთის საგარეო საქმეთა მინისტრი, ელინა ვალტონენი საოკუპაციო ხაზთან ჩავიდა. ის ევროკავშირის სადამკვირვებლო მისიის წარმომადგენლებთან ერთად გადაადგილდებოდა და არ ახლდა არცერთი, რანგით შესაბამისი ოფიციალური პირი საქართველოს დე ფაქტო ხელისუფლებიდან. უნდა აღინიშნოს, რომ საოკუპაციო ზოლთან არასდროს არიან ნამყოფი ბიძინა ივანიშვილი, ირაკლი ღარიბაშვილი, გიორგი კვირიკაშვილი და ოლიოგარქის სხვა პრემიერმინისტრები, დღევანდელი ირაკლი კობახიძის ჩათვლით.
ელინა ვალტონენმა განცხადება გაავრცელა, სადაც მხარს უჭერს საქართველოს ტერიტორიულ მთლიანობას და რუსეთს მოუწოდებს, შეასრულოს 2008 წლის აგვისტოში ნაკისრი ვალდებულებები.
“დღეს მე საქართველოში ევროკავშირის სადამკვირვებლო მისიის შესანიშნავ საქმიანობას გავეცანი, რომელიც ადგილობრივი მოსახლეობის სასარგებლოდ სტაბილურობას ინარჩუნებს. ეუთო და ჩვენი სპეციალური წარმომადგენელი კრისტოფ შპეტი მჭიდროდ თანამშრომლობენ ამ მისიასთან, რათა ამ მნიშვნელოვან ძალისხმევას მხარი დაუჭირონ.
ეუთოს თავმჯდომარის რანგში, ფინეთი მტკიცედ დგას საქართველოს სუვერენიტეტისა და ტერიტორიული მთლიანობის გვერდით, მისი საერთაშორისოდ აღიარებული საზღვრების ფარგლებში, როგორც ეს ჰელსინკის შეთანხმებაშია განსაზღვრული.
ჩვენ მოვუწოდებთ რუსეთს, შეასრულოს 2008 წლის შეთანხმებით ნაკისრი ვალდებულებები და დაბრუნდეს კონფლიქტამდე არსებულ პოზიციებზე”.- ნათქვამია განცხადებაში.