„ქართული ოცნების“ პრემიერ-მინისტრი ირაკლი კობახიძე ბელარუსის რესპუბლიკის საგანგებო და სრულუფლებიან ელჩს ნიკოლაი როგაშჩუკს შეხვდა. მთავრობის ადმინისტრაციის ინფორმაციით, შეხვედრა გაცნობით ხასიათს ატარებდა.
მხარეებმა განიხილეს საქართველო-ბელარუსის ორმხრივი ურთიერთობები, მათ შორის სავაჭრო-ეკონომიკური და სოფლის მეურნეობის მიმართულებით მიმდინარე თანამშრომლობა.
შეხვედრისას ბელარუსის ელჩმა კობახიძეს გადასცა ბელარუსის პრეზიდენტ ალექსანდრ ლუკაშენკოს მისალოცი წერილი, რომელიც ეხებოდა საქართველოში ადგილობრივი თვითმმართველობის არჩევნების წარმატებით ჩატარებას.
მთავრობის ადმინისტრაციის ცნობით, კობახიძემ მადლობა გადაუხადა ბელარუსს საქართველოს სუვერენიტეტისა და ტერიტორიული მთლიანობის მხარდაჭერისთვის, მიულოცა ელჩს დიპლომატიური მისიის დაწყება და წარმატებები უსურვა საქმიანობაში.