XI თაობის ბილიველებისთვის სასწავლო წელი წარმატებით დასრულდა. დასკვნითი ღონისძიება კოლხეთის ეროვნულ პარკში გაიმართა, სადაც „ბილივის“ ახალგაზრდული ჯგუფის წევრებმა პროექტებით, შეხვედრებითა და მრავალფეროვანი აქტივობებით დატვირთული 2024–2025 სასწავლო წელი შეაჯამეს.
დახურვის ღონისძიებაზე, მონაწილეები ჯგუფებად დაყოფილნი წარსდგნენ პრეზენტაციებით მათთვის გამორჩეულ და მნიშვნელოვან პროექტებზე. ბილიველებმა წლის განმავლობაში მონაწილეობა მიიღეს შეხვედრებში, რომელიც ეხებოდა შემდეგ თემებს: ადამიანის უფლებები, მოხალისეობის კულტურა, გენდერული თანასწორობა,ლიდერობა და პიროვნული განვითარება.
მოსწავლეებს გადაეცათ სერტიფიკატები „ბილივის“ საგანმანათლებლო, საქველმოქმედო და მოხალისეობრივ ინიციატივებში შეტანილი განსაკუთრებული წვლილისთვის.
„უკვე მეორე ათწლეულს ვიწყებთ ბილიველებთან ერთად. აღნიშნული პროექტი 2014 წლიდან ყოველწლიურად ხორციელდება. ჩვენი საგანმანათლებლო პროგრამის მიზანია რეგიონში, განსაკუთრებით კი ფოთში მცხოვრები მოსწავლეებისთვის ცოდნისა და გამოცდილების გაზიარება. არაერთი საინტერესო შეხვედრისა და მოხალისეობრივ აქტივობებში ჩართულობის გზით, ჩვენ ვცდილობთ, მხარი დავუჭიროთ ახალგაზრდების პიროვნულ განვითარებას და შევუწყოთ ხელი მათ ჩამოყალიბებას აქტიურ და სოციალურად პასუხისმგებელ მოქალაქეებად.
მოხარულები ვიქნებით, თუ მეტი ორგანიზაცია გამოგვიცხადებს მხარდაჭერას და ჩაერთვება ამ მნიშვნელოვანი ინიციატივის განხორციელებაში – ჩვენ ღია ვართ ახალი იდეებისა და პარტნიორობისთვის,“- აღნიშნა ფონდ „ბილივის“ თანადამფუძნებელმა, მარიკა ნადარაიამ.
„ბილივის“ საგანმანათლებლო პროგრამების კურსდამთავრებულთა რიგებს, რომელიც უკვე 650-ზე მეტ ახალგაზრდას აერთიანებს, წელს კიდევ 70 ფოთელი მოსწავლე შეემატა.
ცნობისთვის, ფონდი „ბილივი“ არის არაკომერციული, არაპოლიტიკური დამოუკიდებელი ორგანიზაცია, რომელიც 11 წლის წინ დასავლეთ საქართველოში, საქველმოქმედო, კულტურული და საგანმანათლებლო საქმიანობის მხარდასაჭერად დაფუძნდა. მისი მიზანია სოციალურად დაუცველი ბავშვებისა და მოსწავლე-ახალგაზრდების ცხოვრების გაუმჯობესება. „ბილივი“ ხელს უწყობს საზოგადოებაში მათ ინტეგრაციას ეხმარება ბენეფიციარებს საკუთარი პოტენციალის რეალიზაციაში, განათლების დონის ამაღლებასა და პროფესიული დონის გაუმჯობესებაში.