ლელო-ძლიერი საქართველოს ლიდერი, მამუკა ხაზარაძე მის და გიორგი გახარიას გუნდს შორის ადგილობრივი თვითმმართველობის არჩევნებზე ურთიერთთანამშრომლობის შესახებ მემორანდუმის გაფორმებას მიესალმება. პოლიტიკურ პატიმრობაში მყოფი ხაზარაძე წერს, რომ თვითმმართველობის არჩევნები დამატებითი ბრძოლის ველია.
“მივესალმები ლელო-ძლიერი საქართველოსა და გახარიას გუნდებს შორის ერთობლივი მემორანდუმის გაფორმებას.
3 თვეში გარდამტეხი ბრძოლა გველოდება, ამიტომ, მნიშვნელოვანია, რომ ოპოზიციური ამომრჩეველი არჩევნების გარეშე არ დავტოვოთ და ხელი არ შევუწყოთ იმას, რომ ქართულმა ოცნებამ ყველა ქალაქისა თუ რეგიონის ადგილობრივი წარმომადგენლობა უპრობლემოდ დაისაკუთროს, რადგან სწორედ ეს იქნება ჩვენთვის მნიშვნელოვანი საყრდენი და პლაცდარმი საბოლოო გამარჯვებისთვის.
ქართველ ხალხს ხელიდან ბერკეტი არ უნდა გამოვაცალოთ – ბოიკოტი კი სწორედ ქართული ოცნების, ანუ რუსული ძალის ჩაბეტონებას შეუწყობს ხელს ადგილობრივ დონეზე. ამის გაკეთება არ შეიძლება. ხალხს და განსაკუთრებით ოპოზიციურ ამომრჩეველს სჭირდება დაცვა ყველა დონეზე – ეს დამატებითი ბრძოლის ველია, უთანასწორო მდგომარეობის მიუხედავად.
ჩვენი მიზანი უცვლელია – ახალი საპარლამენტო არჩევნების მიღწევა და სინდისის პატიმრების გათავისუფლება. ამ სულისკვეთებით გაფორმდა ეს მემორანდუმი, რომლის მიზანიც ერთია – ბრძოლას ყოველთვის აქვს აზრი და არცერთ ადგილას რუსული ძალა ბრძოლის გარეშე არ უნდა დავტოვოთ.
ჩვენ, ლელო-ძლიერი საქართველო ყოველთვის ვიყავით ერთობის ინიციატორები. დღეს, როდესაც ქვეყანას რუსული პოლიტიკა სრულიად იპყრობს, ყველაფერი პირადი უკან უნდა გადავწიოთ და ვიფიქროთ ერთობლივ ბრძოლაზე. ეს მემორანდუმი სწორედ ამის დასტურია. მოვუწოდებ ყველას, შემოგვიერთდნენ ამ ბრძოლაში. ჩვენ გვჯერა ქართველი ხალხის გამარჯვების – ერთად ბრძოლით ეს გარდაუვალია”. – წერს ხაზარაძე ციხიდან გამოგზავნილ წერილში.
პარტიამ გახარია – საქართველოსთვის და ლელო-ძლიერი საქართველომ 2025 წლის ადგილობრივი თვითმმართველობის არჩევნებზე ურთიერთთანამშრომლობის შესახებ მემორანდუმი გააფორმეს.
გახარია-საქართველოსთვის აღმასრულებელი მდივნის, ბერდია სიჭინავას განცხადებით, მემორანდუმი ერთად ბრძოლას გულისხმობს, რაც ნიშნავს, რომ შეეცდებიან შეთანხმდნენ მერობის არაპარტიულ, საერთო კანდიდატებზე.