ისრაელის პრემიერ-მინისტრმა ბინიამინ ნეთანიაჰუმ აშშ-ის პრეზიდენტ დონალდ ტრამპს აცნობა, რომ ნობელის მშვიდობის პრემიაზე მისი კანდიდატურა წამოაყენა. როგორც სააგენტო „ბლუმბერგი“ იუწყება, ამის შესახებ ნეთანიაჰუმ ტრამპს ორშაბათს, თეთრ სახლში, ვახშმობის დროს განუცხადა.
მსურს, ბატონო პრეზიდენტო, გადმოგცეთ წერილი, რომელიც ნობელის კომიტეტს გავუგზავნე. ამ წერილით თქვენი კანდიდატურა წარდგენილია მშვიდობის პრემიაზე – სრულიად დამსახურებულად, და ეს ჯილდო უნდა მიიღოთ, – განაცხადა ნეთანიაჰუმ.
„ბლუმბერგის“ ინფორმაციით, ნეთანიაჰუ ერთადერთი უცხოელი ლიდერი არ არის, რომელმაც ტრამპი ნობელის პრემიაზე წარადგინა. გასულ თვეში პაკისტანმაც განაცხადა, რომ მის კანდიდატურას დააყენებს.
ტრამპი უკვე დიდი ხანია, ნობელის მშვიდობის პრემიის მოპოვებისკენ ისწრაფვის და არაერთხელ გამოუთქვამს უკმაყოფილება იმის გამო, რომ მისი წინამორბედი, ბარაკ ობამა, პირველივე საპრეზიდენტო ვადაში, 2009 წელს, ამ ჯილდოს მფლობელი გახდა.
ნეთანიაჰუს განცხადებაზე საპასუხოდ, ტრამპმა აღნიშნა, რომ ეს ინიციატივა სწორედ ისრაელის პრემიერისგან „მნიშვნელოვანი და ფასეულია“.