ივანიშვილის წარმომადგენელმა თეა წულუკიანმა ევროკავშირის თავდაცვის კომისარს, ანდრიუს კუბილიუსს საგამოძიებო კომისიაზე დაუძინებელი მტერი უწოდა.
ივანიშვილის წამრომადგენელმა მაკა ბოჭორიშვილმა წულუკიანის საგამოძიებო კომისიაზე თქვა, რომ იყვნენ ევროპარლამეტარები, რომლებიც ეუბნებოდნენ, ჩვენ არ მოგცემთ სტატუსს, მივცემთ მოლდოვას და უკრაინას და ვნახოთ, ქართველების 85%, ვინც ევროინტეგრაციას უჭერს მხარს, ქართულ ოცნებას რას უზამს. ბოჭორიშვილის თქმით, მათ შორის ერთ-ერთი შემდეგ ევროკომისარი გახდა.
ბოჭორიშვილმა არ ისაუბრა კონკრეტულ დეპუტატებზე, თუმცა სოზარ სუბარმა რეპლიკის სახით დააზუსტა ვინაობა.
“ევროპარლამენტარი, რომელიც შემდეგ გახდა ევროკომისარი, საქართველოს დაუძინებელი მეგობარი ანდრიუს კუბილიუსი, ჩემი მხრიდან განვმარტავ” – თქვა სუბარმა.
წულუკიანმა სოზარ სუბარის რეპლიკის შემდეგ თქვა:
“ალბათ, დროა, გადავიდეთ იმაზე, რომ დაუძინებელ მტერს დაუძინებელი მეგობარი ვეღარ ერქმევა. ვნახოთ, როგორი იქნება ჩვენი დასკვნა, ეს ძალიან მძიმე ინფორმაციაა, რაც თქვენგან მოვისმინეთ”.