ეკონომიკისა და მდგრადი განვითარების მინისტრი ლევან დავითაშვილი თანამდებობას ტოვებს. ამის შესახებ ირაკლი კობახიძემ მთავრობის ადმინისტრაციაში ბრიფინგზე განაცხადა.
ირკვევა, რომ ლევან დავითაშვილი ეკონომიკურ საკითხებში პრემიერის მთავარი მრჩევლის თანამდებობას დაიკავებს.
ეკონომიკისა და მდგრადი განვითარების მინისტრი მარიამ ქვრივიშვილი გახდა.
დავითაშვილმა გამოსამშვიდობებელ სიტყვაში, მადლობა ბიძინა ივანიშვილს გადაუხადა.
ლევან დავითაშვილი ეკონომიკის მინისტრობასთან ერთად, პირველი ვიცე-პრემიერის პოსტს იკავებდა ირაკლი ღარიბაშვილის მთავრობაშიც, ღარიბაშვილის წასვლის შემდეგ, ეს თანამდებობა მას კობახიძემ შეუნარჩუნა.
ცნობისთვის, ლევან დავითაშვილი სკანდალში ეკონომიკის მინისტრის ყოფილი მოადგილის, რომეო მიქაუტაძის, უკანონო შემოსავლის ლეგალიზაციის ფაქტზე დაკავების შემდეგ მოექცა.
რამდენიმე დღის წინ, “პირველების” კითხვაზე, გამოიკითხა თუ არა აღნიშნულ საქმეზე ვიცე-პრემიერი ლევან დავითაშვილი, კობახიძე ამბობდა: “ლევან დავითაშვილის კეთილსინდისიერებაშიც არავის ეპარება ეჭვი”.
რაც შეეხება მიქაუტაძის საქმეს – პროკურატურის ბრალის მიხედვით, “ქართული ოცნების” ყოფილი მაღალჩინოსანი სისტემატურად ბოროტად იყენებდა სამსახურებრივ უფლებამოსილებას, რასაც თან ახლდა განსაკუთრებით დიდი ოდენობით შემოსავლის მიღება.
საქმის მასალების მიხედვით, ბრალდებულმა მასთან დანაშაულებრივ კავშირში მყოფი პირების დახმარებით განსაკუთრებით დიდი ოდენობით შემოსავლის 2 556 192 ლარის უკანონო დაუსაბუთებელი ლეგალიზაცია განახორციელა.