უკრაინელები “ცხელ დღეებს” აანონსებენ: საჰაერო განგაშის სირენის ხმა ისმოდა წუხელ და გამთენიისას კურსკის, ორიოლის, რიაზანის, კალუგას, მოსკოვის, ვორონეჟის, ნოვოსიბირსკის, ლიპეცკის, ტამბოვის, ბელგოროდის რეგიონებში. მოსკოვის სამმა აეროპორტმა ფრენები შეაჩერა და საგანგებო ვითარებაზე გადავიდა. გამოცხადებულია “წითელი ხალიჩის” რეჟიმი. მასობრივი შეტევის გამო მოსკოვში ინტერნეტთან დაკავშირებული პრობლემებიც იყო – არ მუშაობდა ბანკომატები. აღსანიშნავია, რომ ოკუპირებულ ყირიმს უკრაინელები “ნეპტუნის” რაკეტებით უტევენ.
უკრაინელთა შორს მოქმედი კამიკაძე დრონების მიფრენის შედეგად, საზღვრიდან რამდენიმე ასეული კილომეტრის მოშორებით მოსკოვის ოლქში, კუბინკასა და კალუგის რეგიონში, შაიკოვკას ( ტუ-22მ3-ის შორის მოქმედების ბომბდამშენებია განლაგებული) საჰაერო ბაზებზე, სადაც რუსეთის სტრატეგიული ავიაციაა განთავსებული, ხანძრები გაჩნდა. გავრცელებული ინფორმაციის თანახმად, დარტყმები განხორციელდა საწვავ-საპოხი მასალების საწყობებზე.
რუსეთის აეროპორტებში მასობრივად ფერხდება ავიარეისები უკრაინელთა მიერ ღამითა და გამთენიისას კამიკაძე დრონებით თავდასხმების გამო — მგზავრები საათობით სხედან თვითმფრინავებში წყლისა და საკვების გარეშე, — ინფორმაციას რუსული მედია ავრცელებს. მოსკოვის ოლქზე განხორციელებული უპილოტო აპარატების თავდასხმის შემდეგ რუსების ათეულობით სამოქალაქო რეისმა გადადო ფრენა.
აეროპორტების საჰაერო სივრცის დახურვის გამო ფრენები მასობრივად იგვიანებს, ხოლო მგზავრები ჩივიან საათობით ლოდინზე თვითმფრინავებში, საკვების, წყლისა და შესაბამისი პირობების გარეშე. ზოგიერთ ადამიანს თვითმფრინავში 6-დან 13 საათამდე მოუწია გატარება, ხშირად გასვლის შესაძლებლობის გარეშე, ხოლო ავიაკომპანიები უარს ამბობენ ხარჯების ანაზღაურებაზე ან სასტუმროს შეთავაზებაზე.