საჯარო მოსამსახურეთა დამოუკიდებელი პროფესიული კავშირის “კონსტიტუციის 78-ე მუხლის” თავმჯდომარის, კახი სამხარაძის განცხადებით, დღეის მდგომარეობით, საჯარო სამსახურიდან გათავისუფლებული თანამშრომლების რაოდენობა 800-ს ადამიანს აჭარბებს.

ამასთან, როგორც სამხარაძემ აღნიშნა, მხოლოდ საჯარო რეესტრიდან უკვე 200 ზე მეტი თანამშრომელი გათავისუფლდა.

“საჯარო სამსახურში მიმდინარე რეპრესიები კიდევ უფრო ფართოვდება და იზრდება რეპრესირებული საჯარო მოხელეების რიცხვი. მხოლოდ ერთი უწყებიდან, საჯარო რეესტრიდან განთავისუფლდა უკვე 200-ზე მეტი საჯარო მოსამსახურე და ზოგად მთელ საჯარო სექტორში გათავისუფლებული თანამშრომლების რაოდენობა 800-ს ადამიანს აჭარბებს.

განათლების სამინისტროში 16 აპრილს გამოცხადდა რეორგანიზაცია, რომელიც ამ ეტაპზე ეხება უშუალოდ სამინისტროს ცენტრალურ აპარატს და როგორც ჩვენთვის გახდა ცნობილი, უკვე გაუშვეს რამდენიმე თანამშრომელი – მიუხედავად იმისა რომ რეორგანიზაცია კიდევ 2 თვე გაგრძელდება. ასევე, არსებობს მოლოდინი, რომ რეორგანიზაციის პროცესი შეეხება განათლების სამინისტროს სისტემაში არსებულ სსიპებს, მათ შორის სასწავლი დაწესებულებებს. ჩვენი ინფორმაციით, სახელმწიფო უსაფრთხოების სამსახურმა კიდევ უფრო აქტიურად დაიწყო ჩარევა განათლების სისტემაში და ცდილობს წინასაარჩევნოდ მოასუფთაოს ეს სივრცეც.

მიმდინარე მოვლენების გამოძახილად საქართველოში მოქმედი 10 დამოუკიდებელი პროფესიული კავშირი და სხვა საზოგადოებრივი გაერთიანებები ვგეგმავთ პირველ მაისს კოლმეურნეობის მოედნიდან მსვლელობას, რათა გამოვხატოთ პროტესტი საჯარო მოხელეების მიმართ რეპრესიებისა და ზოგადად ქვეყანაში არსებული უსამართლო სოციალური პოლიტიკის გამო”, – თქვა სამხარაძემ.