100 დღე მზია ამაღლობელის უკანონო პატიმრობიდან – ჟურნალისტის საქმეს “მედია ადვოკატირების კოალიცია” კიდევ ერთხელ ეხმაურება. განცხადებაში იმ გაყალბებულ ჩვენებებზე და ცრუ მოწმე პოლიციელებზეა საუბარი, რომლის საფუძველზეც ოლიაგარქის პარტიამ ჟურნალისტი ციხეში 7 წლიანი მუხლით გამოკეტა.

კოალიცია ხაზს უსვამს, რომ ჟურნალისტის წინააღმდეგ მომართულია სახელმწიფო პროპაგანდა და ყალბი სამართალწარმოება.

„დღეს ასი დღე შესრულდა, რაც მზია ამაღლობელი რეჟიმის ტყვეობაში იმყოფება. მზია ამაღლობელის საქმეში „დაზარალებულ“ პოლიციელებს მხარდამჭერად ცრუ მოწმეები და გაყალბებული ვიდეომასალა მოჰყავთ. მზია ამაღლობელის წინააღმდეგ მიმართულია სახელმწიფო პროპაგანდა, რომელიც ცრუ ინფორმაციის გავრცელებით ცდილობს, საზოგადოებას დაუკარგოს რწმენა საერთო კეთილდღეობისა და სამართლიანობისთვის ბრძოლის მნიშვნელობის მიმართ. საზოგადოება იდგება სიმართლის მხარეს, ისევე, როგორც მზია ამაღლობელი, რომელმაც, როგორც ჟურნალისტმა, სიმართლის ძიება და მისი გახმოვანება პროფესიად და ცხოვრების წესად აირჩია“, – ნათქვამია განცხადებაში.

„ნეტგაზეთისა“ და „ბათუმელების“ დამფუძნებელი მზია ამაღლობელი, 11-12 იანვარს ღამით, ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.