რუსთაველის გამზირზე, 9 აპრილის მემორიალთან ვითარება პერიოდულად იძაბება. მემორიალთან მისვლა საქართველოს ტექნიკური უნივერსიტეტის რექტორმა, დავით გურგენიძემაც სცადა, თუმცა ადგილზე შეკრებილებმა ამის საშუალება მას და მის თანმხლებ პირებს არ მისცეს.

“აჟიტირებული ახალგაზრდები არიან… არა უშავს… ქვეყანაში დაკავებულები იყვნენ წინა რეჟ… ნამდვილი რეჟიმის დროს და არავის ასე არ მოქცეულან. ეს ქართული ხელისუფლებაა. ეკლესიაში მივალ არა უშავს… თქვენ თქვენს ტელევიზიაში მიბრძანდით. ჩემს საქმეს ვაკეთებ, ჩემს ხელში ხართ გაზრდილი სულ ყველა, მე მასწავლებელი ვარ”, – თქვა გურგენიძემ.

მანამდე, რუსთაველის გამზირზე გლდანის მაჟორიტარი, კოტე ზარნაძე მივიდა. მის იქ გამოჩენას ხმაური მოჰყვა. საკრებულოს დეპუტატს ადგილზე მყოფი მოქალაქეები “მონას” შეძახილებით შეხვდნენ და მემორიალთან მისვლის საშუალება არ მისცეს. გარდა ამისა, პარლამენტთან ირაკლი კობახიძის სიძე, აფხაზეთის მთავრობის მინისტრი დავით ფაცაციაც გამოჩნდა. მის იქ მისვლასაც ხმაური და დაპირისპირება მოჰყვა.

შეგახსენებთ, რომ მოქალაქეების ნაწილმა ღამე პარლამენტთან გაათენა. ისინი ამ დრომდე ადგილზე რჩებიან. მათ სიმბოლურად დილის 4:00 საათზე 9 აპრილს დაღუპულთა სულებისთვის ილოცეს და ფიცი დადეს. რუსთაველზე აქცია ახლაც გრძელდება და დედაქალაქის ცენტრალური გამზირი გადაკეტილია.

ფოტო: IPN