“ქართველი ხალხის დევნის აქტი” – ასე აფასებს სამოქალაქო სექტორი “ოცნების” პარლამენტის მიერ შემუშავებულ მორიგ შემზღუდავ კანონპროექტს და აცხადებს, რომ არ აპირებენ რუსული კანონებით ცხოვრებას.
“ჩვენ საქართველოს სამოქალაქო საზოგადოება, კვლავ მტკიცედ ვაცხადებთ – არ ვაპირებთ რუსული კანონებით ცხოვრებას და ბოლომდე გავუწევთ წინააღმდეგობას ქართველი ხალხის დევნის აქტს. არ დავუშვებთ, ივანიშვილის არალეგიტიმურმა ხელისუფლებამ გადაწყვიტოს როდის და როგორ დაეხმარება ქართველი ხალხი ერთმანეთს და კვლავ გამოვხატავთ ერთგულებას საქართველოს კონსტიტუციის, მოქალაქეების უფლებებისა და ღირსების დაცვის მიმართ” აცხადებენ არასამთავრობო ორგანიზაციები.
“ქართული ოცნების” ახალი კანონპროექტის თანახმად, უცხოური გრანტების მიღებას მთავრობის ან მთავრობის მიერ განსაზღვრული უფლებამოსილი პირის თანხმობა დასჭირდება.
კანონპროექტის თანახმად, თანხმობის გარეშე გაცემული გრანტის მიღება აკრძალული იქნება და პასუხისმგებლობის დაკისრებას გამოიწვევს. გარდა ამისა, მთავრობის მიერ გრანტის გაცემის თაობაზე თანხმობის გაცხადებისთვის 10-დღიანი ვადა განისაზღვრება. ამასთან, მთავრობის გადაწყვეტილების გასაჩივრება მის მოქმედებას არ გააჩერებს.
კანონპროექტის მიხედვით, აკრძალული გრანტის გაცემისა და მიღების მონიტორინგს ანტიკორუფციული ბიურო განახორციელებს.