22 წლის თამაზ მთივლიშვილის მკვლელობაში ბრალდებული გიორგი პაპაშვილი, რომელზეც საერთაშორისო ძებნა იყო გამოცხადებული, ინტერპოლმა რუსეთში დააკავა და ამჟამად საექსტრადიციო ღონისძიებები მიმდინარეობს, – ამის შესახებ პროკურორმა ლევან ვეფხვაძემ განაცხადა.
თამაზ მთივლიშვილი 17 თებერვალს, საკუთარ დაბადების დღეზე განსაკუთრებული სისასტიკით, ცემით მოკლეს. დანაშაული ორთაჭალაში მოხდა. მთივლიშვილის ცხედარი რამდენიმე დღის შემდეგ, მკვლელობაში ბრალდებულ გიორგი პაპაშვილის საცხოვრებელ სახლში იპოვეს. მას თავისა და სხეულის სხვადასხვა არეში მრავლობითი დაზიანებები აღენიშნებოდა.
დაკავებულია და წინასწარ პატიმრობაშია სამი პირი – ვერიკო კაპანაძე, ლუკა გვენეტაძე და საბა რობაქიძე. მათ განსაკუთრებით მძიმე დანაშაულის შეუტყობინებლობას ედავებიან. იგივე ბრალდება აქვს ძებნილ ალი გუსეინოვს, ხოლო განსაკუთრებული სისასტიკით ჩადენილ მკვლელობაში ბრალდებულია გიორგი პაპაშვილი. გუსეინოვი და პაპაშვილი შემთხვევის ადგილიდან მიიმალნენ და ქვეყნის დატოვება შეძლეს.
გამოძიება სისხლის სამართლის კოდექსის 108-ე და 376-ე მუხლით მიმდინარეობს, რაც განზრახ მკვლელობასა და დანაშაულის შეუტყობინებლობას გულისხმობს.