თურქეთის ხელისუფლებამ პრეზიდენტ რეჯეფ ტაიპ ერდოღანის მთავარი პოლიტიკური ოპონენტის, სტამბოლის მერის, ექრემ იმამოღლუს ადვოკატი, მეჰმედ ფეჰლივანი დააკავა. ამის შესახებ ინფორმაციას გამოცემა Reuters ავრცელებს.
მთავარი ოპოზიციური პარტიის, CHP-ის დეპუტატმა თურან ტასკინ ოზერმა სოციალურ ქსელში გამოქვეყნებულ პოსტში აღნიშნა, რომ სტამბოლის მერის ადვოკატი “შეთხზული მიზეზების გამო” დააპატიმრეს. თურქეთის პოლიციას დაკავების ოფიციალური მიზეზი ჯერჯერობით არ განუმარტავს.
ექრემ იმამოღლუმ ადვოკატის დაუყოვნებლივ გათავისუფლება მოითხოვა.
სტამბოლის მერი ექრემ იმამოღლუ 19 მარტს დააკავეს კორუფციისა და ტერორიზმის დახმარების ბრალდებებით, თუმცა 23 მარტს წინასწარი პატიმრობა მხოლოდ კორუფციის ბრალდების გამო მიუსაჯეს, შინაგან საქმეთა სამინისტრომ კი უფლებამოსილება შეუჩერა. სტამბოლის მერის ექრემ იმამოღლუს დაკავებისა და თანამდებობიდან გათავისუფლების შემდეგ, სტამბოლის საქალაქო საკრებულომ მერის პოსტზე კვლავ ოპოზიციონერი, CHP-ის წევრი ნური ასლანი აირჩია.
ექრემ იმამოღლუს დაკავების შემდეგ თურქეთში მასშტაბური საპროტესტო აქციები დაიწყო მმართველი პარტიის წინააღმდეგ. დაკავებული აქციის მონაწილეების რაოდენობა ათასს აჭარბებს. საპოლიციო ძალები საპროტესტო აქციებს ძალადობრივი მეთოდებით შლიან. რესპუბლიკური სახალხო პარტიის თავმჯდომარის ოზგურ ოზელის განცხადებით პროტესტი კვლავ გაგრძელდება. ოზელმა მასშტაბური აქცია შაბათს, მალტეპეში დაანონსა, სადაც მისი თქმით, მოხდება საპრეზიდენტო კანდიდატად ექრემ იმამოღლუს წარდგენა და მოითხოვენ მის გათავისუფლებას.