ამერიკის შეერთებული შტატების პრეზიდენტის, დონალდ ტრამპის განცხადებით, ოვალურ კაბინეტში უკრაინის პრეზიდენტთან, ვოლოდიმირ ზელენსკისთან კამათი იყო უკრაინაზე ზეწოლის სტრატეგიის ნაწილი. შესაბამისი განცხადება ტრამპმა ჟურნალისტებთან საუბრის დროს გააკეთა.
“ჩვენ გვჭირდებოდა, რომ უკრაინა სწორად მოქცეულიყო. ეს არ იყო იოლი სიტუაცია. თქვენ ნახეთ პატარა სცენა ოვალურ კაბინეტში, მაგრამ მე ვფიქრობ, რომ ისინი ახლა სწორად იქცევიან და ჩვენ ვცდილობთ მივიღოთ სამშვიდობო შეთანხმება, მივიღოთ ცეცხლის შეწყვეტა და შემდეგ სამშვიდობო შეთანხმებაც”, – თქვა თეთრი სახლის ლიდერმა.
თეთრი სახლის ლიდერი ამბობს, რომ ომს უკრაინაში ეწირება ბევრი ადამიანია და ის დარწმუნებულია, რომ ყველაფერი სწორად გააკეთა. მისივე თქმით, აშშ-ის გადაწყვეტილებას უკრაინისთვის იარაღის მიწოდების შეწყვეტის შესახებ არანაირი შედეგი არ მოჰყოლია უკრაინის ჯარისთვის.
შეგახსენებთ, რომ 28 თებერვალს, ვოლოდიმირ ზელენსკი ვაშინგტონში ოფიციალური ვიზიტით ჩავიდა. ის პრეზიდენტ ტრამპს შეხვდა, თუმცა ოვალურ კაბინეტში მიმდინარე შეხვედრის დროს, რომელსაც მედიაც ესწრებოდა ორი ქვეყნის ლიდერმა რამდენჯერმე იკამათეს და ვითარება პერიოდულად იძაბებოდა. მოგვიანებით გახდა ცნობილი, რომ დახურულ კარს მიღმა დაგეგმილი შეხვედრა, მინერალებზე შეთანხმება და ერთობლივი პრესკონფერენცია გაუქმდა და ვოლოდიმირ ზელენსკიმ თეთრი სახლი დატოვა. ამ შეხვედრის შემდეგ დასავლურმა, დემოკრატიულმა სამყარომ ტრამპი გააკრიტიკა, ხოლო რუსეთმა ის შეაქო.