აშშ-ის პრეზიდენტის სპეციალური წარმომადგენელი უკრაინასა და რუსეთში, კიტ კელოგი, ომის დასრულებაზე მაღალი დონის მოლაპარაკებებიდან, მოხსნეს. NBC News -ის ინფორმაციით, პუტინი კელოგს ზედმეტად პრო-უკრაინულად მიიჩნევს, სავარაუდოდ ამის გამო მიიღო ტრამპის ადმინისტრაციამ კელოგის მოლაპარაკებებიდან მოხსნის გადაწყვეტილება.
„კელოგი არის ყოფილი ამერიკელი გენერალი, რომელიც ძალიან ახლოსაა უკრაინასთან. ეს არ არის ჩვენი კაცი, არც ისეთი კალიბრის, რომელსაც ჩვენ ვეძებთ”, – თქვა მედიასთან რუსმა ოფიციალურმა პირმა ანონიმურობის პირობით.
ტრამპის ადმინისტრაციის ოფიციალურმა წარმომადგენელმა NBC-ს დაუდასტურა, რომ რუსეთს არ სურს კელოგის ჩართვა მოლაპარაკებებში. წყარომ არ იცის, როდის შეატყობინეს ამის შესახებ თეთრ სახლს. კელოგის ოფისს კომენტარი არ გაუკეთებია.
80 წლის კელოგი, გადამდგარი გენერალი, დონალდ ტრამპის ერთგული მხარდამჭერია და მისი პირველი ვადის პრეზიდენტობისას სხვადასხვა თანამდებობებზე მუშაობდა.
კელოგი საუდის არაბეთში აშშ-ის დელეგაციის მიერ გამართულ მოლაპარაკებებს არ დასწრებია არც რუსეთთან და არც უკრაინასთან.
თებერვალში კიტ კელოგი კიევში უკრაინის პრეზიდენტს შეხვდა, რის შემდეგად მან ზელენსკის “ომში მყოფი ქვეყნის მამაცი ლიდერი” უწოდა.