თეატრალურის სტუდენტებმა უკვე მიიღეს მეილზე შეტყობინება რექტორის გადაწყვეტილების შესახებ, რომ სტატუსს აღარ შეუწყვეტენ, თუმცა ამავე განცხადებაში ნათქვამია, რომ გიორგი შალუტაშვილმა სტუდენტებს წერილობითი გაფრთხილება მაინც მისცა.რექტორის ამ გადაწყვეტილების შესახებ გუშინ გახდა ცნობილი. იქამდე კი სტუდენტებსა და შალუტაშვილს შორის, საზოგადოებრივ მაუწყებელზე პირდაპირი ეთერი დაანონსდა, თუმცა “ოცნების” კულტურის სამინისტრომ გუშინვე განაცხადა , რომ შალუტაშვილის გადაწყვეტილების შემდეგ, თემა დახურულია და სატელევიზიო დებატების საჭიროება აღარ არსებობს.
თეატრალურის სტუდენტები შეცვლილი გადაწყვეტილების მიუხედავად, პირდაპირ ეთერსა და საჯარო დებატებს რექტორთან მაინც ითხოვენ და დღეს, 22 საათისთვის ისინი საზოგადოებრივ მაუწყებელთან შეიკრიბებიან.
შეგახსენებთ, 10 მარტს თეატრალური უნივერსიტეტის სტუდენტურმა მოძრაობამ გაავრცელა ინფორმაცია, რომ პროტესტში მონაწილე სტუდენტების ნაწილს სტატუსი შეუწყვიტეს. სტუდენტებმა ადმინისტრაციისგან შესაბამისი ცნობა მეილზე მიიღეს. იქამდე კი სტუდენტებთან, რომლებიც უნივერსიტეტში უწყვეტ პროტესტს მართავდნენ, ადმინისტრაციამ პოლიცია გამოიძახა.