,,მაუწყებლობის შესახებ’’ საქართველოს კანონში ცვლილებების შეტანის შესახებ 3 კანონპროექტს სოციალური სამართლიანობის ცენტრი საგანგაშოს უწოდებს და აცხადებს, რომ ის არსებითად ეწინააღმდეგება ადამიანის უფლებათა საერთაშორისო სამართლით და საქართველოს კონსტიტუციით განმტკიცებულ ფუნდამენტურ უფლებებს.

SJC-ის შეფასებით, ,,მაუწყებლობის შესახებ’’ კანონში ინიცირებული ცვლილებები ძირს უთხრის მედიის და გამოხატვის თავისუფლებებს.

პირველი კანონპროექტი – შინაარსობრივი შეზღუდვები და რეგულაციები მაუწყებლების საქმიანობაზე:

“ეს ცვლილება აწესებს ახალ რეგულაციებს მაუწყებლობის სტანდარტებზე, როგორიცაა ფაქტის სიზუსტე, მიუკერძოებლობა, პირადი ცხოვრების დაცვა და საგანგებო ვითარებების გაშუქება. აქამდე ეს საკითხები მაუწყებელთა თვითრეგულირებით განისაზღვრებოდა, ხოლო ახალი კანონის მიხედვით, მათ კონტროლს და დარღვევების სანქცირებას კომუნიკაციების ეროვნული კომისია განახორციელებს. არასამთავრობო სექტორი მიიჩნევს, რომ ეს ცვლილება მედიის თავისუფლების შეზღუდვისა და კრიტიკული მედიის დასჯის მექანიზმად შეიძლება იქცეს.”

მეორე კანონპროექტი – დაფინანსების კუთხით დადგენილი შეზღუდვები:

“კანონპროექტი კრძალავს მაუწყებლების უცხოური დაფინანსების ყველა ფორმას, გარდა კომერციული რეკლამებისა და პროდუქტის განთავსებისა. უცხოური ძალად განისაზღვრება უცხო ქვეყნის მთავრობები, არაქართული იურიდიული და ფიზიკური პირები. ეს შეზღუდვა საფრთხეს უქმნის დამოუკიდებელი მედიის ფინანსურ მდგრადობას და შესაძლოა, ხელისუფლებისგან კრიტიკულად განწყობილი მედია დაასუსტოს.”

მესამე კანონპროექტი – გენდერული თანასწორობის კუთხით გაუარესებული მდგომარეობა:

“ეს ცვლილება ეხება მაუწყებლობაში გენდერული თანასწორობის სტანდარტებს და არსებითად ასუსტებს მათ დაცვის მექანიზმებს. კერძოდ, კანონპროექტი ამცირებს იმ ვალდებულებებს, რომლებიც მაუწყებლებს ავალდებულებდა გენდერულად მგრძნობიარე შინაარსის წარმოებას, ქალებისა და მოწყვლადი ჯგუფების წარმომადგენლობის ზრდას მედიაში და დისკრიმინაციისგან დაცვის მექანიზმებს.” აცხადებს ორგანიზაცია.

SJC-ის შეფასებით, “ოცნების” მიერ, მედიასაშუალებების წინააღმდეგ მიმართული ინიციატივები – ,,მაუწყებლობის შესახებ’’ საქართველოს კანონში ინიცირებული უკიდურესად პრობლემური შინაარსის ცვლილებები, მედია საშუალებების უფლებების შემზღუდველი რეგულაციები და მათზე კონტროლის გამკაცრება კომუნიკაციების კომისიის მეშვეობით მიუთითებს იმაზე, რომ ე.წ. ხელისუფლება ცდილობს კრიტიკულ მედია საშუალებებზე ზეწოლის გაძლიერებას და ქვეყანაში ჯერ კიდევ შენარჩუნებული თავისუფალი სივრცეების მაქსიმალურად ჩახშობას, მისი ავტორიტარული ძალაუფლების კიდევ უფრო გასამყარებლად.

ოლიგარქის “დეპუტატებმა” ,,მაუწყებლობის შესახებ’’ საქართველოს კანონში ცვლილებების შეტანის კანონპროექტი 24 თებერვალს დააინიცირეს.