დიდთოვლობიდან მე-7 დღესაც პარალიზებულია რეგიონები – მძიმე მდგომარეობაა გურიაში. 8 სოფელი გარესამყაროს არის მოწყვეტილი. ყველაზე კრიტიკულ მდგომარეობაშია სოფლები – სურები, დაბლაციხე, ბუკისციხე, დიდივანი, შუა სურები, ზემო სურები, თავსურები, ტობახჩა.
სტიქიის პირისპირ მოქალაქეებს გამკლავება დამოუკიდებლად უწევთ. ზოგიერთი მათგანი სახლ-კარის გარეშე არის დარჩენილი, რადგან თოვლის დიდმა მასამ საცხოვრებელი ჩამოუნგრია. ადგილობრივებს საკვების მარაგიც ამოეწურათ და სწორედ ამიტომ მათი მდგომარეობის შემსუბუქებას მოხალისეები ნიჩბებითა და დრონებით ცდილობენ.სტიქიის ზონაში ჩარჩენილი ხალხი დახმარებას ითხოვს. გურიის მაღალმთიანი სოფლები ამ დრომდე გარესამყაროს არის მოწყვეტილი. ასობით ოჯახს ისევ არ აქვს ელექტროენერგია და გათბობა, ეწურებათ საკვების მარაგები და მედიკამენტებიც. დილიდან გურიის სოფლებში ისევ თოვს, რაც ვითარებას კიდევ უფრო ართულებს.