ეუთოს საპარლამენტო ასამბლეის ზამთრის სესიის შეხვედრაზე, სამი კომიტეტის გაერთიანებულ სხდომაზე საქართველოს საკითხზე მსჯელობენ, ოპოზიციას მოლოდინი აქვს, რომ ეუთოში შესაბამისი მოხსენებაც მომზადდება, რომლის საფუძველზე მომავალში შესაძლოა უკვე აღარ მოხდეს საქართველოს დღევანდელი არალეგიტიმური ხელისუფლების წარმომადგენლების მიწვევა შესაბამის ფორმატებში
ეუთო-ს საპარლამენტო ასამბლეის მომხსენებელმა, კარინა ოდებრინკმა ეუთოს დემოკრატიის, ადამიანის უფლებებისა და ჰუმანიტარული საკითხების კომიტეტის სხდომაზე განაცხადა, რომ გასული წლის არჩევნების შემდეგ საქართველოში პოლიტიკური რეპრესიები მკვეთრად იზრდება.
“არჩევნების შესახებ ოდირის ანგარიშში აღნიშნულია, რომ დაფიქსირდა ამორჩევლების დაშინების, საარჩევნო კამპანიების დაფინანსების დისბალანსის და პოლიტიზირებული მედია პროპაგანდის შემთხვევები, ამ ყველაფერმა ხელი შეუწყო არჩევნების დემოკრატიული პრინციპების დარღვევას“, – აღნიშნა კარინა ოდებრინკმა.
ოდებრინკის განცხადებას გამოეხმაურა ლევან მახაშვილი, რომელიც ეუთოში საპარლამენტო დელეგაციის წევრად არის წარმოდგენილი, ოლიგარქის პარლამენტიდან. მახაშვილმა ქვეყანაში რეპრესიების არსებობა უარყო და კარინა ოდებრინკს მიმართა, რომ საქართველოს ხელისუფლება მზად არის თანამშრომლობისთვის და ვიდეო მტკიცებულებების გაზიარებისთვის.
საქართველოში შექმნილ ვითარებაზე შეშფოთება გამოთქვა ეუთო-ს საპარლამენტო ასამბლეაში ნორვეგიის დელეგაციის ხელმძღვანელმა, სივ მოსლეტმა. მისი თქმით, გმობენ საქართველოში დემონსტრანტების, მედიის მუშაკების, სამოქალაქო საზოგადოების წარმომადგენლების და ოპოზიციის წინააღმდეგ სასტიკი ძალის გამოყენებას.