ბათუმის საქალაქო სასამართლომ „ბათუმელების“/„ნეტგაზეთის“ დამფუძნებლის და დირექტორის, მზია ამაღლობელის პატიმრობის გაუქმების შუამდგომლობა დაუშვებლად ცნო. მისი თქმით, კომენტარს თბილისში მყოფი უფლებადამცველები უახლოეს წუთებში გააკეთებენ.
განცხადება რამდენიმე წუთის წინ საიამაც გაავრცელა:
მზია ამაღლობელისთვის აღკვეთის ღონისძიების შეცვლის თაობაზე ადვოკატების შუამდგომლობა, ბათუმის საქალაქო სასამართლოს მოსამართლემ, ლევან ყოლბაიამ დაუშვებლად სცნო.
ესაა სასამართლოს მორიგი უკანონო და დაუსაბუთებელი გადაწყვეტილება მზია ამაღლობელის წინააღმდეგ. არ არსებობს არავითარი საფუძველი, რაც მის პატიმრობას გაამართლებს.
ამ გადაწყვეტილებებით ქართული მართლმსაჯულება საკუთარი უკანონობის ისტორიას წერს.
სასამართლოს განჩინებას სააპელაციო სასამართლოში გავასაჩივრებთ” – აცხადებს საია.
ცნობისთვის, გისოსებს მიღმა გამოკეტილი ჟურნალისტის უფლებადამცველებმა ბათუმის საქალაქო სასამართლოს შუამდგომლობით მიმართეს. ადვოკატები მოითხოვდნენ დაუყოვნებლივ შეცვლილიყო საპატიმრო აღკვეთი ღონისძიება, რადგან, იურისტები ამბობენ, რომ სამართლებრივად მზია ამაღლობელის პატიმრობა გაუმართლებელია. მათივე განცხადებითვე გაირკვა, რომ სადავოა ოქმიც, რომლის საფუძველზეც მზია ამაღლობელი ბათუმში დააკავეს.