დღეს, 4 თებერვალს „ოცნების“ პარლამენტში საგაზაფხულო სესია გაიხსნა – სხდომაზე პრეზიდენტად ნანიშნულ მიხეილ ყაველაშვილს მოუსმინეს.
სხდომა 28 წუთში დასრულდა, რადგან ყაველაშვილის მოხსენების შემდეგ სიტყვით გამოსვლა არავინ ისურვა, არადა გამოსვლის დასრულების შემდეგ სიტყვით გამოდიან ფრაქციათა თავმჯდომარეები და საპარლამენტო უმრავლესობის ლიდერი უნდა გამოსულიყო.
წინასწარ დაწერილ ტექსტის კითხვისას მიხეილ ყაველაშვილმა თქვა, რომ 26 ოქტომბერს ქართულმა საზოგადოებამ აირჩია მშვიდობა და განვითარება, ტრადიციების, ღირებულებების, სარწმუნოების, ოჯახისა და ღირსების დაცვა.
„სურთ თუ არა საქართველოს არაკეთილმოსურნე ძალებს, მოუწევთ, პატივი სცენ ქართველი ხალხის უმრავლესობის არჩევანს. სწორედ 26 ოქტომბრის არჩევნები იყო ნათელი დადასტურება იმისა, თუ სად დგას ქართველი ხალხი, რას იცავს და რას ნიშნავს მისთვის საქართველო”- განაცხადა “ქართული ოცნების” პრეზიდენტმა.
ყაველაშვილი ირწმუნება, რომ საქართველოს განადგურების საფრთხე ჯერ არ გამქრალა.
ბიძინა ივანიშვილის მიერ პრეზიდენტად არჩეულმა ყაველაშვილმა ისაუბრა მშვიდობაზე, ახსენა “გარე ჩარევები”, რევოლუციის მოწყობის მცდელობებზე.
ყაველაშვილი ამტკიცებს, რომ „დონალდ ტრამპის გამარჯვების შემდეგ დაიწყო ფსევდოლიბერალური წესრიგის ცვლილება მსოფლიოში“, რასაც დონალდ ტრამპის ეფექტი უწოდა.
“ოცნების” პრეზიდენტმა, “ქართული ოცნების” დეპუტატების წინაშე სიტყვით გამოსვლისას, ვახო გომელაურის თანამშრომლებს “მოქალაქეების უსაფრთხოებისა და ქვეყანაში წესრიგის დაცვისთვის” მადლობა გადაუხადა.
ე.წ. პრეზიდენტს არცერთხელ არ უხსენებია რუსეთი და პუტინისგან მომდინარე საფრთხეები.
მიხეილ ყაველაშვილის მოხსენებაზე პარლამენტში მედიას შეზღუდვები დაუწესდა.
ყაველაშვილის გამოსვლის პარალელურად პარლამენტთან მედიის წარმომადგენლები და მოქალაქეები აქციას მართავდნენ და მზია ამაღლობელის და სხვა უკანონო პატიმრების გათავისუფლებას მოითხოვდნენ.