ბათუმის ხელოვნების უნივერსიტეტის 3 სტუდენტს და დეკანს პატიმრობა გირაოთი შეუცვალეს, ერთი სტუდენტი კი პატიმრობაში დატოვეს – გადაწყვეტილება ბათუმის საქალაქო სასამართლოს მოსამართლემ, ლევან ყოლბაიამ ცოტა ხნის წინ მიიღო.

აღკვეთი ღონისძიების შეცვლა დღევანდელ პროცესზე პროკურორმა თავად მოითხოვა. გირაოს თანხა 5 000 ლარია. ბრალდებულები დარბაზიდან გათავისუფლდნენ.

პატიმრობაში რჩება სტუდენტი ანრი კაკაბაძე. ის ამავე კატეგორიის დანაშაულისთვის გირაოთი აქამდე იყო გათავისუფლებული. სწორედ ამ არგუმენტით დატოვა მოსამართლემ კაკაბაძე პატიმრობაში.

ბათუმის ხელოვნების უნივერსიტეტში პროფესორი და ერთ-ერთი ფაკულტეტის დეკანი, მამუკა ჯორბენაძე და 4 სტუდენტი 9 დეკემბერს დააკავეს. მათ გამოძიება ჯგუფური ძალადობის ჩადენას ედავება. მამუკა ჯორბენაძე ბათუმში მიმდინარე საპროტესტო აქციების აქტიური მონაწილეა.

დაკავებამდე მას ლექტორის, თეა ცაგურიას ქმარი დაემუქრა და ფიზიკურად გაუსწორდა. მუქარის ამსახველი შეტყობინების სქრინი სტუდენტებმა გაასაჯაროვეს. ახალგაზრდების თქმით, ცაგურიას ქმარი ირაკლი დევაძე, თანამდებობის პირია.

თეა ცაგურია კი ის ლექტორია, რომელიც აქციების მონაწილე სტუდენტებს შეურაცხყოფას ხშირად აყენებს. ასე მოხდა 3 დეკემბერსაც, როდესაც ის პლაკატების გაკვრის გამო სტუდენტებს ეჩხუბა, რასაც პროცესების შემდგომი განვითარება მოჰყვა.