კომპანია Reformatics-ის დამფუძნებელი, ნიკა გილაური იმ მძიმე ეკონომიკურ შედეგებზე საუბრობს, რომელსაც ქვეყანას სანქცირებული და არალეგიტიმური მთავრობა უქმნის. როგორც გილაური ამბობს, 2025-ის მძიმე ეკონომიკური პროგნოზი ჯერ კიდევ სანქციებამდე კეთდებოდა და ახლა კი ვითარება კიდევ უფრო გართულდება და 3-4 თვეში საგრძნობი გახდება, მათ შორის, უმუშევრობის გაზრდითაც:
“სანამ სანქციებზე მივიდოდა საქმე, მანამდე უკვე ცუდად იყო რეალურად ეკონომიკის პროგნოზში თუ ჩავიხედავდით მომავალი წლის და ციფრები არ ტყუიან. საერთაშორისო-საფინანსო ორგანიზაციები, რომლებმაც უნდა გადმორიცხონ საკმაოდ დიდი თანხები მომავალ წელს, გააჩერეს პროგრამები. პირდაპირი ინვესტიციები რომლებიც უნდა შემოსულიყო მომავალ წელს, გააჩერეს გადმორიცხვები, ეს გადმორიცხვები მათ გააჩერეს ჯერ კიდევ სანქციებამდე.
გარდა ამისა, ტურიზმში გვაქვს აშკარა ჩამოვარდნა. თქვენ რომ ნახოთ და ჰკითხოთ სასტუმროებისა და რესტორნების მფლობელებს, მათ აქვთ 50%-იანი ვარდნა.
ქვეყანაში თანხა შემოდის საერთაშორისო ინვესტიციების, საერთაშორისო საფინანსო ინსტიტუტების, ტურიზმისა და ექსპორტის მიმართულებით. აქედან სამი არის სერიოზულად შემცირებული- 50% შემცირება აქვს ერთს, 50% მეორეს და შეიძლება 55% მესამეს. ანუ, ჩვენ გვაქვს სერიოზული ეკონომიკური პრობლემების პროგნოზის უკვე გამზადებული სურათი. ამას დაემატა კიდევ სანქციები , რაც კიდევ უფრო გააუარესებს.
ჩვენ რეალურად დავინახავთ უახლოეს 3-4 თვეში საკმაოდ მძიმე ეკონომიკურ ეფექტს როგორც კურსის თვალსაზრისით, ასევე ინფლაციის თვალსაზრისით, ასევე ეკონომიკის შემცირების თვალსაზრისით და სავარაუდოდ, უმუშევრობის გაზრდის თვალსაზრისით.” ამბობს ნიკა გილაური.