დიდი ბრიტანეთის ევროპისა და ჩრდილოეთ ამერიკის საკითხებში სახელმწიფო მინისტრი, სტივენ დოუტი საქართველოში მიმდინარე მოვლენებს ეხმაურება და განცხადებას ავრცელებს, რომელშიც დაგმობილია მშვიდობიან დემონსტრანტებზე ძალადობა და ჟურნალისტების მიმართ განხორციელებული ქმედებები. დოუტის განცხადებაში ნათქვამია, რომ ქართველი ხალხი აჩვენებს, რომ წინააღმდეგია “ოცნების” გადაწყვეტილების, შეაჩეროს ევროინტგრაციის შემდგომი ნაბიჯები:

“საქართველოში ხალხი მკაფიოდ აცხადებს, რომ ეწინააღმდეგება „ქართული ოცნების“ გადაწყვეტილებას, შეაჩეროს ქვეყნის შემდგომი ნაბიჯები ევროპული მომავლისკენ, რაც პირდაპირ ძირს უთხრის საქართველოს კონსტიტუციას.
ვგმობ სასტიკი და გადაჭარბებული ძალის გამოყენებას მომიტინგეებისა და ჟურნალისტების მიმართ, რასაც ადგილი აქვს ბოლო დღეებში. როგორც ევროპის უსაფრთხოებისა და თანამშრომლობის ორგანიზაციამ აღნიშნა, ეს არის შეკრების თავისუფლების უფლების სერიოზული დარღვევა.
მოვუწოდებთ საქართველოს ხელისუფლებას, მოუსმინოს ხალხს, განმუხტოს ეს სიტუაცია და შეცვალოს ევროპული ღირებულებებისგან გადახვევის მავნე კურსი. დემოკრატიული ნორმებისა და თავისუფლებებისგან დაშორებული ნაბიჯების გადადგმა მხოლოდ საქართველოს საერთაშორისო რეპუტაციას დააზარალებს და ძირეულად დააზიანებს ურთიერთობებს საქართველოს მეგობრებთან და პარტნიორებთან.” ნათქვამია განცხადებაში.