ცესკოს ოპოზიციონერი წევრები გიორგი კალანდარიშვილს მოუწოდებენ, სხდომა მოიწვიოს და ახალი არჩევნების ჩატარებაზე იმსჯელოს. ოპოზიციონერები თანხმდებიან, რომ არჩევნებზე ხმის ფარულობა მასიურად იყო დარღვეული, რაც თეთრიწყაროს სასამართლოს მოსამართლის გადაწყვეტილებამ კიდევ ერთხელ ცხადყო.
ის, რომ ეს არჩევნები იყო სპეცოპერაცია, ამაზე ყველა საუბრობს. მომზადებულია სხვადასხვა მტკიცებულება, რომელიც ჩვენს საერთაშორისო პარტნიორებს მიეწოდება. ერთი რამ ყველასთვის ცხადია, რომელსაც არც ხელისუფლება, არც ცესკო და არავინ უარყოფს, ეს გახლავთ ის, რომ ამომრჩევლის ფარულობა ტექნოლოგიზებულ უბნებზე მასობრივად იყო დარღვეული. თეთრიწყაროს რაიონულმა სასამართლომ შექმნა პრეცედენტი და შესაბამისი უბნების შედეგები გააუქმა. ეს იმას ნიშნავს, რომ არსებობს სამართლებრივი საფუძველი არჩევნების არჩატარებულად გამოცხადებისა და ხელახალი არჩევნების დანიშვნისთვის, – განაცხადა გიორგი სიორიძემ საგანგებო ბრიფინგზე.
ხელახალი არცევნების დანიშვის მნიშვნელობაზე საუბრობს “ერთიანობა ნაციონალური მოძრაობის” წარმომადგენელი ცესკოში დავით კირთაძე.
არჩევნებიდან 10 დღე გავიდა და ამ 10 დღის განმავლობაში ჩართული მხარეები, არასამთავრობო ორგანიზაციები და რაც მთავარია, ქართველი ამომრჩეველი აპროტესტებდა კონსტიტუციის ძირითადი პრინციპის-ფარულობის დარღვევას. ეს კიდევ ერთხელ დაადასტურა გუშინდელმა სასამართლომ.
ცესკო-ს ოპოზიციონერი წევრები მოვითხოვთ, ცესკო-ს თავმჯდომარემ, გიორგი კალანდარიშვილმა სასწრაფო წესით მოიწვიოს კომისიის სხდომა, სადაც არჩევნები არჩატარებულად გამოცხადდება და მოვითხოვთ ხელახალი არჩევნების ჩატარებას,- განაცხადა დავით კირთაძემ.
შეგახსენებთ, რომ გუშინ თეთრიწყაროს რაიონულ სასამართლოში საიას სარჩელთან დაკავშირებით პროცესი გაიმართა. მოსამართლე ვლადიმერ ხუჭუამ პრეცედენტული გადაწყვეტილება გამოიტანა და თქვა, რომ 26 ოქტომბრის არჩევნებზე ხმის ფარულობა ნამდვილად დარღვეული იყო. მოსამართლემ სხდომაზე ექსპერიმენტიც ჩაატარა, ბიულეტენი გააფერადა და ელექტრონულ აპარატში შეაცურა. ამგვარად, ორ მუცინიპალიტეტის 30 უბნის შედეგები ბათილად იქნა ცნობილი.