ახმეტის რაიონის სოფელ აწყურში, თეთრი გიორგის ეკლესიის სამრეკლოსთან დაკრძალული, ქაქუცა ჩოლოყაშვილის შეფიცულთა რაზმის წევრის ალექსანდრე სულხანიშვილის საფლავი განადგურებულია, ნეშტი კი უკანა ეზოში გადაასვენეს, – ამის შესახებ “მთის ამბები” იტყობინება. 

როგორც ეკლესიის დეკანოზი ‘მთის ამბებთან” ამბობს, საფლავის გადატანა “უმაღლეს დონეზე იყო შეთანხმებული”. 

აღსანიშნავია, რომ თავის დროზე სამრეკლოსთან ალექსანდრე სულხანიშვილის საფლავი ზვიად გამსახურდიას დავალებით მოეწყო. ამ დროისთვის უცნობია, რა ბედი ეწია საფლავის ქვასა და ჯვარს, რომლითაც მოპირკეთებული იყო “შეფიცულთა რაზმის” წევრის საფლავი. 

ალექსანდრე სულხანიშვილი საქართველოს ოკუპაციისა და გასაბჭოების შემდეგ იბრძოდა ქაქუცა ჩოლოყაშვილის შეფიცულთა რაზმში. იგი ქაქუცას ერთ-ერთი მოადგილე იყო.

ალექსანდრე სულხანიშვილი მონაწილეობდა 1924 წლის აგვისტოს აჯანყებაში, რომლის დამარცხების შემდეგ ქაქუცა ჩოლოყაშვილთან და რაზმის სხვა წევრებთან ერთად, თურქეთში გადავიდა და მას შემდეგ, 66 წელი ემიგრაციაში გაატარა.

მასთან ინახებოდა ქაქუცა ჩოლოყაშვილის ძვირფასი ხმალ–სატევარი, რომელიც საქართველოს დაუბრუნა. ჟურნალისტ პაატა ნაცვლიშვილის დახმარებით, 1990 წლის 19 ოქტომბერს, 94 წლის მოხუცი სამშობლოში დაბრუნდა. თან ჩამოიტანა პატარა პაკეტი წარწერით „საქართველოს მიწა“. საქართველოში მხოლოდ 18 დღე იცოცხლა.