„ქართულმა საზოგადოებამ, ისევე როგორც ჩვენმა უცხოელმა პარტნიორებმა, ყველამ ერთად დავინახეთ, რომ „ოცნებას“ ვადა გაუვიდა, ამის შესახებ ერთიანობა ნაციონალური მოძრაობის“ გენერალურმა მდივანმა, პეტრე ცისკარიშვილმა გუშინდელ მარშთან დაკავშირებით განაცხადა. ოპოზიციონერი ლიდერის თქმით, ივანიშვილის ხელისუფლება დასრულებია და ეს 26 ოქტომბრის არჩევნებზე ოფიციალურად გაფორმდება.

ქართულმა საზოგადოებამ, ისევე როგორც ჩვენმა უცხოელმა პარტნიორებმა ყველამ ერთად დავინახეთ, რომ „ოცნებას“ ვადა გაუვიდა. „ქართული ოცნება“ დასრულებულია, როგორც მმართველი ძალა, უბრალოდ 26 ოქტომბერს ჩვენ ეს საქმე უნდა მივიყვანოთ ბოლომდე, გამარჯვება გავაფორმოთ, დავიცვათ ხმები, მანიპულაციების და გაყალბების საშუალება ივანიშვილის რეჟიმს არ უნდა მივცეთ და როგორც გუშინდელი მარშის დროს მთელი საქართველოს საზოგადოება ერთსულოვანი იყო ევროკავშირში საქართველოს გაწევრიანებასთან დაკავშირებით, ასე საქმით, შრომით, ეკონომიკის განვითარებით, საგარეო ვექტორის ცვლილებით დავაბრუნოთ ჩვენი ქვეყანა ევროპულ გზაზე,- განაცხადა პეტრე ცისკარიშვილმა.

თავისუფლების მოედანზე ევროპულ აქციაზე 90 ათასიდან 100 ათასამდე ადამიანი იმყოფებოდა – ინფორმაციას Visioner ავრცელებს. მარში სახელწოდებით “საქართველო ირჩევს ევროპას” თავისუფლების მოედანზე გუშინ გაიმართა. ათასობით მოქალაქეს სიტყვით საქართველოს პრეზიდენტმა სალომე ზურაბიშვილმა მიმართა. არჩევნებამდე ერთი კვირით ადრე ხალხი ქუჩაში იმის სათქმელად გამოვიდა, რომ ირჩევენ ევროპას და უარს ეუბნებიან რუსეთს.