სალომე ზურაბიშვილის იმპიჩმენტის მოთხოვნით საკონსტიტუციო სარჩელი სასამართლოში არჩევნებამდე რამდენიმე დღით ადრე შევა. ამის შესახებ პრემიერმა სვეტიცხოვლის ტაძრის ეზოში ისაუბრა.
ირაკლი კობახიძემ დაადასტურა, რომ პრეზიდენტის გადაყენებას “ოცნებისთვის” მხოლოდ სიმბოლური დატვირთვა აქვს. ამასთან, პრემიერი ირწმუნება, რომ არჩევნების შემდეგ ნოემბერ-დეკემბერში სალომე ზურაბიშვილს თანამდებობიდან ასზე მეტი ხმით გადააყენებენ.
იმპიჩმენტს აქვს ძალიან მნიშვნელოვანი სიმბოლური დატვირთვა, რადგან, არ შეიძლება, ადამიანი, რომელიც უხეშად არღვევდა კონსტიტუციას, მიზანმიმართულად და შეგნებულად ჩადიოდა ქვეყნის ღალატს, იმპიჩმენტის გარეშე წავიდეს თანამდებობიდან. აქედან გამომდინარე, მას ერთი თვით ადრე, ნაადრევად შეუწყდება უფლებამოსილება სწორდ იმპიჩმენტის საფუძველზე. ჩვენ წინა იმპიჩმენტით ყველას დავანახეთ, რომ ერთადერთი, ვისი ხმებითაც რჩება თანამდებობაზე სალომე ზურაბიშვილი, ეს არის კოლექტიური „ნაციონალური მოძრაობა“. დღეს რომ მას უკავია პრეზიდენტის თანამდებობა, არის კოლექტიური „ნაციონალური მოძრაობის“ ხმების დამსახურება. ახლა უკვე სხვა მოცემულობა იქნება. ნოემბრის ბოლოს, დეკემბრის დასაწყისში, ჩვენ ასზე მეტი ხმით, თანამდებობიდან გადავაყენებთ სალომე ზურაბიშვილს“, – განაცხადა პრემიერმა.
შეგახსენებთ, რომ “ქართული ოცნება” პრეზიდენტის წინააღმდეგ იმპიჩმენტს ხელახლა აანონსებს. ივანიშვილის გუნდი სალომე ზურაბიშვილის ისევ გადაყენებით ემუქრება. განცხადება მმართელ პარტიაშია 7 ოქტომბერს გაკეთდა. ქვეყნის პრემიერმა ასევე თქვა, რომ “მას შემდეგ, რაც “ქართული ოცნება” პარლამენტში ას მანდატზე მეტს მიიღებს, მყისიერად, პირველი სხდომის გამართვის შემდეგ პრეზიდენტის იმპიჩმენტი განხორციელდება”.
სალომე ზურაბიშვილს პრეზიდენტობის ვადა საპარლამენტო არჩევნებიდან ერთ თვეში ისედაც ეწურება. ივანიშვილის გუნდს კი უნდა, რომ სალომე ზურაბიშვილს გადაყენებული პრეზიდენტის სტატუსი მიანიჭოს.