გამოცემა Insider-ის ცნობით, რუსი ოპოზიციონერის, ალექსეი ნავალნის კოლონიაში მოწამვლის დამადასტურებელი დოკუმენტაცია მოიპოვეს. გამოცემა წერს, რომ გამომძიებელმა ჟურნალისტებმა ასობით ოფიციალურ დოკუმენტს მიაგნეს, რომლებიც სწორედ ნავალნის გარდაცვალებასთანაა დაკავშირებული.

მასალებიდან გამომდინარე, ჟურნალისტები აღნიშნავენ, რომ ხელისუფლებამ დოკუმენტებიდან სპეციალურად ამოიღო ჩანაწერები იმ სიმპტომების შესახებ, რომლებიც ნავალნის გარდაცვალების ოფიციალურ ვერსიას არ ემთხვევა – ნავალნი უჩიოდა მუცლის ტკივილს, ღებინებას და კრუნჩხვებს – თუმცა მოგვიანებით ხელისუფლებამ ეს ცნობები დოკუმენტებიდან ამოიღო – აღნიშნავს Insider

„სიკვდილის ოფიციალური მიზეზი – გულის რითმის დარღვევა – არანაირად არ ხსნის იმ სიმპტომებს, რომლებსაც ჩვენ ვხედავთ დოკუმენტებში: მუცლის მწვავე ტკივილი, ღებინება და კრუნჩხვები. ასეთი სიმპტომები ძნელად აიხსნება სხვა რამით, გარდა მოწამვლისა“, – თქვა რეანიმატოლოგმა ალექსანდრე პოლუპანმა, რომელიც ნავალნის 2020 წელს ნოვიჩოკის მოწამვლის შემდეგ მკურნალობდა.

Insider-ის ცნობით, მისი ეს სიტყვები სხვა ექიმებმაც დაადასტურეს.

ოპოზიციონერი პოლიტიკოსი და ბლოგერი ალექსეი ნავალნი რუსეთის ციხეში 16 თებერვალს დაიღუპა. რუსეთის საგამოძიებო კომიტეტმა გარდაცვალების გამოძიებაზე უარი თქვა. ოფიციალურ ვერსიად კი “ბუნებრივი სიკვდილი” დასახელდა.