ანტიკორუფციული ბიუროს ხელმძღვანელის, რაჟდენ კუპრაშვილის განმარტებით, თუ “საერთაშორისო გამჭვირვალობა – საქართველო”, მისი ხელმძღვანელი ეკა გიგაური, ასევე სამოქალაქო მოძრაობა “აირჩიე ევროპა” და მისი დამფუძნებლები ბიუროს გადაწყვეტილებით, 5 დღის ვადაში საბანკო ანგარიშებს არ წარადგენენ, უწყება დამატებით ზომებს მიიღებს და მონიტორინგით თავად დაითვლის მათ ხარჯებს.
“თუ გადაწყვეტილება არ აღსრულდება, ეს იქნება სამწუხარო, თუმცა მე დამჭირდება კიდევ დამატებითი გადაწყვეტილების მიღება და ჩვენ დავითვლით აღნიშნულ ხარჯებს, მონიტორინგით. კანონი გვაძლევს ჩვენ საშუალებას გამოვითხოვოთ ყველა ის ინფორმაცია, რაც ამ საქმის წარმოებას სჭირდება, რა თქმა უნდა, ფიზიკური და იურიდიული პირის ანგარიშებიც მათ შორის.
შეხვედრები, რომ ევროპა რა კარგია, რა თქმა უნდა, ნორმალურია. ამავდროულად, ადამიანს აქვს თავისუფალი არჩევანის გაკეთების უფლება – მე შეიძლება მომწონდეს რომელიმე კონკრეტული პოლიტიკური პარტია და არ მომწონდეს სხვა, მაგრამ როცა თქვენ მატერიალურ თანხას იხდით იმ აქტივობებში, რაც დაკავშირებული არის პირდაპირ, კონკრეტული პოლიტიკური პარტიების მხარდაჭერისკენ და ამავდროულად, კონკრეტული პოლიტიკური პარტიის თავშეკავების მიზნით, თქვენ ხართ ვალდებული გახადოთ საჯარო ამ საქმიანობაში დახარჯული თანხები… მე აღვასრულებ კანონს. საბანკო ანგარიშებით უნდა დავადგინო კონკრეტული ტრანზაქციები, თორემ აბა ხომ არ დაგვესიზმრება.
თუ ვხედავთ, რომ სავარაუდოდ შესაძლებელია კანონის დარღვევასთან გვქონდეს საქმე, მაშინ, რა თქმა უნდა გვაქვს უფლება სასამართლოს ნებართვით გამოვითხოვოთ ეს ანგარიშები, შევამოწმოთ, შევისწავლოთ. ასეთი დისკრეცია გააჩნია ძალიან ბევრ უწყებას,” – განაცხადა რაჟდენ კუპრაშვილმა.
შეგახსენებთ, ანტიკორუფციულმა ბიურომ “აირჩიე ევროპა” და TI “გაცხადებული საარჩევნო მიზნის მქონე სუბიექტებად” ცნო და ფინანსური ანგარიშების გახსნისთვის 5 დღე მისცა.