ზუგდიდის საკრებულოში ფრაქცია “ახალის” წარმომადგენელი მაია კალანდია ბათუმში 16 სექტემბერს მომხდარ ერთ შემთხვევაზე წერს, რა დროსაც რესტორანი დაატოვებინეს რუს ტურისტს, რომელიც ჯერ კერძს იწუნებდა, შემდეგ მიირთვა და ბოლოს ფასდაკლების გარეშე გადახდაზე უარს ამბობდა, მისი თქმით, პერსონალმა რუსეთის მოაქალაქეს საფასაური გადაახდევინა და რესტორანი დაატოვებინა, იქ მყოფებმა კი ტურისტი სტვენით გააცილეს:
“არ დავწერო არ შემიძლია, ისეთი გახარებული ვარ, ვწერ და ხელები მიკანკალებს.
ამბავი მოხდა ბათუმის რესტორანში, ამ საღამოს.
რუსმა კლიენტმა სტეიკი მოითხოვა. მიუტანეს, ასეთი არაო, ძვლიანი მინდოდაო. შეუცვალეს!
ასეთი არა ისეთიო, მე სხვანაირი მინდოდაო. ვაკუუმში მიუტანეს, შეარჩიეო, კი ოღონდ ფასდაკლება გამიკეთეთო. არაო, უთხრეს. მიირთვა და მიმტანს უთხრა, ფასდაკლება მეკუთვნისო და დაიწყო გახურება. პერსონალიდან ერთ-ერთი თავზე დაადგა და სასწრაფოდ გადაახდევინა საფასური, ოპერაციის დასრულების შემდგომ კი უბრძანა, სასწრაფოდ დაეტოვებინა იქაურობა. ხმამაღლა მიაძახა, რომ კარგი იქნება, თუკი საქართველოსაც დატოვებს მალე.
დარბაზში მყოფმა ახალგაზრდებმა სტვენით გააცილეს რუსი. მთავარ პერსონაჟს კი მადლობა გადაუხადეს!
ასე იქცევიან თავმოყვარე ადამიანები!”, – წერს მაია კალანდია