რუსული კანონის საწინააღმდეგო აქციაზე დაკავებულ გიორგი შანიძეს თბილისის საქალაქო სასამართლომ 4 წლით პატიმრობა მიუსაჯა. შანიძეს პროკურატურა აქციის მიმდინარეობისას პარლამენტის მიმდებარე ტერიტორიაზე სათვალთვალო კამერის დაზიანებას ედავებოდა. შანიძე დაკავების დღიდან, 8 მაისიდან წინასწარ პატიმრობაში იმყოფებოდა. პროცესზე სასამართლოს თავად გიორგი შანიძემაც მიმართა და მის საქმეში პოლიტიკურ მოტივზე ისაუბრა.
“თავს მაინცდამაინც კრიმინალად ვერ მივიჩნევ. ვფიქრობ რომ ჩემი ქვეყნისთვის საჭირო საქმეს ვაკეთებდი და იმიტომ ჩავიდინე ეს დანაშაული, რასაც მედავებიან და არა იმიტომ რომ კამერის დაზიანება მსურდა, როგორც პროკურორი იძახის.
ვფიქრობ რომ ამ მუხლის მიმართ მიდგომა შეცვლილია და პირადად ვიცნობ ადამიანებს, რომლებიც გაცილებით მეტი ოდენობით, უბრალო პირობითით გაუშვეს გარეთ და რომ არა პოლიტიკური სარჩული მე საერთოდ არ დამიჭერდნენ და გარეთ ვიქნებოდი. ვფიქრობ, რომ თქვენს ხელთ არსებული ბერკეტი შეგიძლიათ გამოიყენოთ, 50-ე მუხლის სახით და პირობითი სასჯელით დამტოვოთ გარეთ. ყოველ შემთხვევაში, მე ვფიქრობ, რომ პატიმრობა არ მეკუთვნის” – განაცხადა გიორგი შანიძემ.
გამამტყუნებელ განაჩენს ელოდნენ, თუმცა პირობითი სასჯელის იმედი ჰქონდათ გიორგი შანიძის ოჯახის წევრებსაც და სხვა სამოქალაქო აქტივისტებსაც.
“4 წელი ნამდვილად მოულოდნელი იყო, მაგრამ საჩვენებელი დასჯა რომ იქნებოდა მაგას ველოდით და ასეც მოხდა. ეგ გზავნილია, რომ ყველას იგივე მოგველის, თუ არ გავჩუმდებით, მაგრამ არ გავჩუმდებით,” – აცხადებს სამოქალაქო აქტივისტი თეონა მესტუმრე.