გორში მდებარე ანტისაოკუპაციო რესტო ბარის მფლობელი სამოქალაქო აქტივისტი იოსებ ბაბაევი პოლიციამ დააკავა. ბაბაევი გორში, ბიძინა ივანიშვილის დახვედრის მიზნით დაწესებულ შეზღუდვებს და ადგილობრივი ხელისუფლების ქმედებებს აპროტესტებდა.
შინაგან საქმეთა სამინისტროს საზოგადოებასთან ურთიერთობის სამსახურის განცხადებით, ბაბაევს პოლიციელის კანონიერ მოთხოვნაზე დაუმორჩილებლობას ედავებიან.
იოსებ ბაბაევის საქმეზე გორის რაიონულ სასამართლოს დღეს უნდა ემსჯელა, თუმცა ბიზნესმენი სასამართლოში არ გადაიყვანეს, რის გამოც, მას, სავარაუდოდ, 2 დღის წინასწარი დაკავების იზოლატორში გატარება მოუწევს.
სამთავრობო მედიების განცხადებით, ბაბაევი იმ ტერიტორიაზე ცდილობდა შეჭრას სადაც “ქართული ოცნების” წინასაარჩევნო ღონისძიება იმართება და სადაც ბიძინა ივანიშვილი სიტყვით უნდა გამოვიდეს, თუმცა ვიდეოკადრში ჩანს, რომ დაკავებული საკუთარ რესტორანში პროდუქტების მისატანად მანქანით ცდილობდა მისვლას, რა დროსაც მას საპოლიციო ძალებმა გზა გადაუკეტეს და დააკავეს.