რუსეთის დედაქალაქს წუხელ უკრაინელებმა დრონებით შეუტიეს, მოსკოვის შემოგარენი უპილოტო საფრენი აპარატების სამიზნე ღამის საათებში გახდა. მოსკოვის მერის თქმით, სხვადასხვა რაიონში 13 უპილოტო საფრენი აპარატი ჩამოაგდეს. ერთ-ერთი მათგანი რამენსკოეში მაღალსართულიან კორპუსს დაეჯახა, რის შედეგადაც მე-11-მე-12 სართულების რამდენიმე ბინაში ხანძარი გაჩნდა. მერი ამბობს, რომ არავინ დაშავებულა.
ბრიანსკის ოლქის გუბერნატორი ამტკიცებს, რომ საჰაერო თავდაცვამ სულ 59 დრონი ჩამოაგდო.
ტულის რეგიონის ხელისუფლება იტყობინება ორი ჩამოგდებული უპილოტო საფრენი აპარატის შესახებ, რომელთაგან ერთის ნამსხვრევები “საწვავ-ენერგეტიკული კომპლექსის ერთ-ერთ ობიექტზე” დაეცა.
ლიპეცკის ოლქის გუბერნატორმა, იგორ არტამონოვმა ასევე დაადასტურა, რომ რეგიონს უპილოტო საფრენი აპარატები უტევდნენ.